ახალი წლის აღნიშვნას ტრადიციულად თან ახლავს მრავალფეროვანი მუსიკალური ღონისძიებები. 2025 წელს დაგეგმილი კონცერტები აერთიანებს სხვადასხვა ჟანრსა და ფორმატს, რომლებშიც მონაწილეობას იღებენ როგორც საერთაშორისო, ასევე ადგილობრივი შემსრულებლები. ღონისძიებები გაიმართება სხვადასხვა სივრცეში, განსხვავებული კონცეფციით.
გთავაზობთ 31 დეკემბრის ღამესა და 1-ელ იანვარს თბილისში დაგეგმილი მუსიკალური ღონისძიებების გზამკვლევს:
ახალ წელს Club Iveria მრავალფეროვანი მუსიკალური ღონისძიებებით ხვდება. ახალი წლის ღამეს Republic-ის სივრცეში სცენაზე წარდგება Gigi Pianomen & Smooth Jazz Band. ღონისძიების დეტალურ პროგრამას გაეცანით ბმულზე.
31 დეკემბერს Monohall-ში გაიმართება საახალწლო კონცერტი, სახელწოდებით „ჩვენი 2026“, სადაც მონაწილეობას მიღებენ გიორგი გიგაშვილი, ნინი ნუცუბიძე, კატო კვარაცხელია და ნიკალა. მუსიკალური პროგრამა აერთიანებს ქართულ და უცხოურ ნაწარმოებებს, ასევე მონაწილე მუსიკოსების საავტორო სიმღერებსა და კომპოზიციებს.
მეისი გრეი Republic Event Hall-ში
31 დეკემბერს Republic Event Hall-ის სცენაზე მსმენელის წინაშე ცნობილი ამერიკელი მუსიკოსი მეისი გრეი წარდგება. არტისტი ცნობილია უნიკალური ხმის ტემბრით და გამორჩეული მუსიკალური სტილით. მისი შემოქმედება სოულისა და R&B-ის ჟანრებს აერთიანებს. მეისი გრეის დისკოგრაფიაშია ისეთი ჰიტები, როგორიცაა: I Try, Sweet Baby და Beauty in the World.
საახალწლო მუსიკალური საღამოების სერიას გვთავაზობს Tatuza Jazz Club. 31 დეკემბერის საღამოს გახსნის ჩიკაგოელი ჯაზმენი რობ ქლირფილდი, რომელიც თავის კვარტეტთან ერთად დაუკრავს. 2026 წლის დადგომისთანავე მათ შეუერთდება ქართველი ჯაზმომღერალი ლიკუნა თუთისანი. მსმენელის წინაშე წარდგებიან: ლიკუნა თუთისანი – ვოკალი, რობ ქლირფილდი – ფორტეპიანო, მელვინ მარკესი – ტენორ საქსოფონი, კლიმონ დალდოსო – ბასი, რაჯივ ჯაიავირა – დასარტყამი ინსტრუმენტები. 1-ელ იანვარს Tatuza-ს სცენაზე ლუკა თოფურიას და ლიზა კერესელიძის მუსიკალური საღამო გაიმართება. მსმენელის წინაშე ასევე წარდგება ხატია ქორიძე (ბასი) და ზაზა ცერცვაძე (დრამი). Tatuza Jazz Club-ის სრული საახალწლო პროგრამა იხილეთ ბმულზე.
31 დეკემბერს სასტუმრო ტელეგრაფი SOLO-სთან და Visa-სთან ერთად წარმოგიდგენთ ახალი წლის ღამის ღონისძიებას Rolling Stone Rooftop Bar-ში. საღამო მოიცავს სამი არტისტის სეტებს და საახალწლო მუსიკალურ პროგრამას. ამასთან, ერთობლივ სეტს დაუკრავს თბილისის ელექტრონული სცენის ორი არტისტი – Nearsonic და გიო ქათამაძე (Mind Waves). მსმენელის წინაშე ასევე წარდგება სპენსერ პარკერი, რომელიც ჰაუსისა და დისკოს სცენის საერთაშორისო ფიგურაა. Rolling Stone Rooftop Bar-ის საახალწლო ღონისძიებებს გაეცანით ბმულზე
31 დეკემბერს, ახალი წლის ღამეს The Theatre უმასპინძლებს საახალწლო ღონისძიებას ლელა წურწუმიას მონაწილეობით. მომღერალი სცენაზე საკუთარ ბენდთან ერთად წარდგება. ღონისძიების სრული პროგრამა ართიანებს ცოცხალ მუსიკას, DJ სეტებსა და შოუს ელემენტებს.
31 დეკემბერს, საახალწლო ღამეს, Arteria-ში TAMADA-ს კონცერტია დაგეგმილი. ღონისძიება თბილისის ისტორიის მუზეუმის სივრცეში – ქარვასლაში გაიმართება და გააერთიანებს როგორც ცოცხალ მუსიკალურ პერფორმანსს, ასევე DJ სეტებს.
Mr. Belt & Wezol-ის მუსიკალური საღამო Republic Event Hall-ში
1-ელ იანვარს Republic Event Hall-ში ნიდერლანდური დუეტი, სახელწოდებით Mr. Belt & Wezol წარდგება. 2024 წლის ჰიტის – It’s Not Right But It’s Okay-ს ავტორები ელექტრონული მუსიკის მოყვარულებს ჰაუსის ჟანრის ტრეკების სეტებს შესთავაზებენ.
საახალწლო საპროტესტო კონცერტი რუსთაველზე
31 დეკემბერს, ახალი წლის ღამეს, რუსთაველზე საქართველოს მუსიკოსთა პროფესიული კავშირისა და „კულტურა დემოკრატიისთვის“ ორგანიზებით საპროტესტო კონცერტი გაიმართება. ღონისძიებაში მონაწილეობას მიიღებენ სხვადასხვა თაობისა და ჟანრის მუსიკოსები.
სატელევიზიო ფორმატის საახალწლო კონცერტი
თბილისის მერიამ წელსაც დააანონსა საახალწლო გალა კონცერტი, რომელსაც ამჯერად სატელევიზიო ფორმატი ექნება და მაყურებელი მას 31 დეკემბრის ღამეს იხილავს.
