პირველად, ბინგ კროსბის Ultimate Christmas „ბილბორდის” ტოპ გასტრიმული ალბომების ჩარტის ლიდერია. 2026 წლის 3 იანვრით დათარიღებულ ჩარტში ალბომმა მესამედან პირველ ადგილზე გადაინაცვლა. ეს კროსბის პირველი ლიდერობაა ჩარტში 2-წლიან ისტორიაში.
1977 წელს გარდაცვლილი მუსიკოსის სადღესასწაულო კომპოზიციების ნაკრები მოიცავს ისეთ სიმღერებს, როგორებიცაა White Christmas, it’s Beginning To Look a Lot Like Christmas, Do You Hear What I Hear? და Mele Kalikimaka. ჩარტის ლიდერი ის აშშ-ში 106 000 ალბომის ეკვივალენტი სტრიმით გახდა, რაც მასში შემავალი სიმღერების 140.71 მილიონ ოფიციალურ სტრიმს უდრის. აღნიშნული მონაცემები წარმოადგენს როგორც კროსბის პირად რეკორდს, ასევე რეკორდს სადღესასწაულო ალბომისთვის. Ultimate Christmas-მა გასული წლის საკუთარი რეკორდიც მოხსნა: 2025 წლის 4 იანვრით დათარიღებულ ჩარტში მის სიმღერებს 125.77 მილიონი სტრიმი ჰქონდა.
Ultimate Christmas ასევე დაწინაურდა Billboard 200-ის მეორე ადგილზე (გასულ წელს მესამე ადგილს იკავებდა). ის ასევე ლიდერობს ტოპ სადღესასწაულო ალბომების ჩარტში.
50 ტოპ გასტრიმული ალბომების ჩარტი აშშ-ში კვირის ყველაზე ხშირად დასტრიმული ალბომების რეიტინგია. რეიტინგი ალბომების ეკვივალენტის ერთეულით დგება, რაც მოიცავს 3750 რეკლამით მხარდაჭერილ ან 1250 ფასიან/გამოწერილ ოფიციალურ აუდიო-ვიდეო სტრიმს ალბომის ყველა სიმღერისთვის. თუ მუსიკოსის ერთი სიმღერა რამდენიმე ალბომშია შესული, ეკვივალენტი სტრიმი იმ ალბომს მიეკუთვნება, რომელიც მოცემულ კვირას ტრადიციული გაყიდვებით ლიდერობს.
