გერმანიაში მცხოვრები ქართველი არტისტი ლიზი გოზალიშვილი 27 თებერვალს ჯაზკლუბ „არტერიაში” ბენდთან ერთად კონცერტს გამართავს. ეს მომღერლის პირველი სოლო კონცერტია საქართველოში.
ლიზი გოზალიშვილისთვის ეს საღამო არა მხოლოდ დებიუტი, არამედ შინ დაბრუნების, საკუთარი იდენტობის ხელახლა აღმოჩენის და მუსიკალური გამოცდილების გაზიარების აქტია.
ლიზი გოზალიშვილი – მომღერალი:
„2026 წლის 27 თებერვალს საქართველოში, კერძოდ თბილისში, ჯაზკლუბ „არტერიაში“ პირველ კონცერტს ჩავატარებ. ამასთან დაკავშირებით გერმანიიდან მომყავს ჩემი ბენდი სრული შემადგენლობით.
უკვე რამდენიმე წელია, გერმანიაში ვცხოვრობ და მუსიკალურ საქმიანობას ვეწევი, შესაბამისად ეს კონცერტი ახლა ასმაგად მნიშვნელოვანია. შესაძლებლობა მეძლევა, ქართველ მსმენელს გავუზიარო ის, რასაც ბოლო პერიოდში საზღვარგარეთ ვქმნიდი და ამასთან, ჩემს გერმანელ ბენდის წევრებს გავაცნო ჩემი ქვეყანა.
რეპერტუარში შევა ჩემი საავტორო სიმღერები, ბევრი ჯერ კიდევ გამოუქვეყნებელიც, მათ შორის ყველაზე ახალი და ჩემი პირველი ქართულენოვანი სიმღერა, რომელიც ამ კონცერტის ინსპირაციადაც შეიძლება მოვიხსენიო. ქართულ ენაზე სიმღერის დაწერამ თავიდან მაპოვნინა საკუთარი თავი მუსიკაში და რა გასაკვირია, რომ ამ ყველაფრის გაზიარება ყველაზე მეტად ქართველ მსმენელთან მინდა.
დიდი სურვილი მაქვს, ეს კონცერტი ზუსტად ისეთივე სიმბოლური და ემოციური იყოს ყველასთვის, როგორიც ჩემთვისაა და თითოეულ მსმენელამდე მივიტანო ის ენერგია, რომელიც ჩემს მუსიკაში დიდი ხანია, საქართველოსგან ძალიან შორს გროვდება.“
ლიზი გოზალიშვილის პირველი სოლო კონცერტი საქართველოში მომღერლის პირად ისტორიასა და შემოქმედებით გზას აერთიანებს. არტისტი საავტორო მუსიკასთან ერთად ცნობილ ქართულ და უცხოურ ქავერ სიმღერებსაც შეასრულებს.
ბილეთების შესაძენად ეწვიეთ ბმულს.
