კანიე უესტმა კიდევ ერთი ბოდიში მოიხადა – Yeezy-მ The Wall Street Journal-ის 26 იანვრის ნომერში სრულგვერდიანი განცხადება განათავსა, რომელშიც ბრენდის დამფუძნებელი უესტი, ბოლო წლებში გაკეთებული ანტისემიტური განცხადებების გამო, ებრაელ ხალხს ბოდიშს უხდის. უესტმა შავკანიან საზოგადოებას და იმ ადამიანებსაც მიმართა, ვისაც მისი ქცევითა და განცხადებებით ტკივილი მიაყენა. არტისტმა ასევე გაიხსენა 2002 წელს მომხდარი ავტოავარია, რომლის დროსაც ყბა მოიტეხა და აღნიშნა, რომ მიღებულმა ტვინის დაზიანებამ შესაძლოა გავლენა იქონია მის შემდგომ ქცევაზე.
„ოცდახუთი წლის წინ ავტოავარიაში მოვხვდი, რის შედეგადაც ყბა მოვიტეხე და ტვინის მარჯვენა შუბლის წილი დამიზიანდა,“ – წერს ის. „იმ დროს ყურადღება მხოლოდ ხილულ დაზიანებებზე იყო გადატანილი – მოტეხილობაზე, შეშუპებასა და ფიზიკურ ტრავმაზე. უფრო ღრმა დაზიანება, რომელიც თავის ქალის შიგნით იყო, შეუმჩნეველი დარჩა.“
უესტის თქმით, ტვინის დაზიანება სათანადო დიაგნოზით არ შეფასებულა და ამას მოგვიანებით ფსიქიკური ჯანმრთელობის პრობლემები, მათ შორის ბიპოლარული აშლილობა მოჰყვა. აღსანიშნავია, რომ აშშ-ის ჯანმრთელობის ეროვნული ინსტიტუტის მიერ 2023 წელს გამოქვეყნებული კვლევის მიხედვით, ადამიანები, რომლებმაც ტვინის ტრავმა მიიღეს, ბიპოლარული აშლილობის განვითარების 1.28-ჯერ მაღალი რისკის ქვეშ არიან, განსაკუთრებით მაშინ, თუ დაზიანება 11-15 წლის ასაკში ხდება. ანგარიშში ასევე აღნიშნულია, რომ ტვინის ტრავმა შესაძლოა ანთებით პროცესებს იწვევდეს, რაც ფსიქიკურ პრობლემებს განაპირობებს.
„ბიპოლარულ აშლილობას თავისი თავდაცვის მექანიზმიც აქვს – უარყოფა. მანიაკალური ფაზის დროს არ ფიქრობ, რომ ავად ხარ. გგონია, რომ სხვები აჭარბებენ. გგონია, სამყაროს უფრო მკაფიოდ ხედავ, მაშინ, როცა რეალურად მთლიანად კარგავ კონტროლს. ვთქვი და გავაკეთე ის, რასაც გულწრფელად ვნანობ. ადამიანებს, რომლებიც ყველაზე მეტად მიყვარდა, ცუდად მოვექეცი,” – მიმართა საზოგადოებას YE-მ. „უკან მოხედვისას ვხვდები, რომ საკუთარ ნამდვილ თავთან კავშირი დავკარგე.“
განსაკუთრებით მძიმე თემად უესტმა სვასტიკის გამოყენება დაასახელა, რომელიც Yeezy-ს მერჩენდაიზზეც გამოჩნდა. მისი თქმით, გარკვეული მომენტები მეხსიერების ჩავარდნებს უკავშირდებოდა, რომელთა გახსენებაც დღესაც უჭირს.
„ამ მდგომარეობაში ყველაზე დამანგრეველ სიმბოლოს შევეხე – სვასტიკას და მისი გამოსახულებით მაისურებსაც კი ვყიდდი,“ – წერს ის. Ye ხაზგასმით აღნიშნავს, რომ პასუხისმგებლობას სრულად იაზრებს; რომ ის ნაცისტი არ არის და ებრაელი ხალხის მიმართ სიყვარულს გრძნობს.
„ბიპოლარული აშლილობის პირველი ტიპის ერთ-ერთი რთული ასპექტია ის მომენტები, რომელთაგან ბევრი დღემდე არ მახსოვს. მათ არასწორ გადაწყვეტილებებამდე და უგუნურ ქცევამდე მიმიყვანეს, რაც ხშირად სხეულიდან გამოსვლის გამოცდილებას ჰგავდა. ამას მთელი გულით ვნანობ და მრცხვენია. ვიღებ პასუხისმგებლობას და ერთგულად მივყვები მკურნალობასა და რეალურ ცვლილებებს. ეს ჩემს ქმედებებს არ ამართლებს. მე არ ვარ ნაცისტი და არ ვარ ანტისემიტი. მე მიყვარს ებრაელი ხალხი.“
Anti-Defamation League-მა Ye-ს ბოდიში „დიდი ხნით დაგვიანებულად“ შეაფასა. Billboard-ისთვის მიწოდებულ განცხადებაში ორგანიზაციის წარმომადგენელმა აღნიშნა, რომ ეს ბოდიში ავტომატურად ვერ გააბათილებს მის ანტისემიტურ ქცევებს, მათ შორის სიმღერას, პოსტებს, სვასტიკების გამოყენებასა და ჰოლოკოსტის თემებზე გაკეთებულ მრავალ მინიშნებას. „ნამდვილი ბოდიში იქნება ის, რომ მომავალში აღარ გამოავლინოთ ანტისემიტური ქცევა,“ – აღნიშნავს ADL.
Ye-მ ასევე ისაუბრა ეპიზოდზე, რომელმაც, მისი თქმით, გასული წლის დასაწყისში მისი ცხოვრება სრულად დაანგრია და მძიმე ფსიქოლოგიურ მდგომარეობამდე მიიყვანა. „ძალიან ვწუხვარ, რომ იმედები გაგიცრუეთ. მიყვარხართ. 2025 წლის დასაწყისში ოთხთვიან მანიაკალურ ეპიზოდში ჩავვარდი. ფსიქოზური, პარანოიდული და იმპულსური ქცევები მქონდა, რომელმაც ჩემი ცხოვრება გაანადგურა.“
უესტის თქმით, დღეს ის ეფექტური მკურნალობის რეჟიმს იცავს, რომელიც მედიკამენტებს, თერაპიასა და ფიზიკურ აქტივობას აერთიანებს. განცხადება მიმართვით დაასრულა – არა თანაგრძნობის, არამედ მოთმინებისა და გაგების თხოვნით.
„ენერგიას ვხარჯავ პოზიტიურ და შინაარსიან ხელოვნებაზე – მუსიკაზე, ტანსაცმელზე, დიზაინსა და ახალ იდეებზე, რომლებიც სამყაროს დაეხმარება. არ ვითხოვ თანაგრძნობას ან განსაკუთრებულ მოპყრობას. უბრალოდ მოთმინებასა და გაგებას გთხოვთ, სანამ საკუთარ გზას ვიპოვი.“
ანტისემიტური განცხადებების სერიის გამო, 2022 წელს კანიე უესტთან ისეთმა კომპანიებმა შეწყვეტეს თანამშრომლობა, როგორებიცაა: Balenciaga, Universal Music Group, Adidas და Gap. 2025 წლის ნოემბერში ის ასევე შეხვდა რაბი იოშიჰაუ იოსეფ პინტოს, რათა პასუხისმგებლობა აეღო და ებრაულ საზოგადოებას ბოდიში მოეხადა.
პარალელურად, Ye ახალი ალბომის – Bully-ს გამოსაცემად ემზადება. თვის ბოლოს არტისტი სცენაზე დაბრუნებასაც გეგმავს. 30 და 31 იანვარს რეპერს მეხიკოში ორი კონცერტი აქვს დაანონსებული.
