ჰარი სტაილსი და Doechii 2026 წლის გრემის დაჯილდოებაზე ნომინაციის გამარჯვებულის პირველ გამომცხადებლებად დასახელდნენ. ისინი დაჯილდოების ცერემონიაზე უკვე დაანონსებულ შემსრულებლებს: საბრინა კარპენტერს, Clipse-ს და ფარელ უილიამსს შეუერთდებიან. ასევე ცნობილია „საუკეთესო ახალი არტისტის“ რვა ნომინანტი – ედისონ რეი, ალექს უორენი, KATSEYE, ლეონ თომასი, ლოლა იანგი, ოლივია დინი, sombr და The Marías.
ჰარი სტაილსის მეოთხე სტუდიური ალბომი Kiss All the Time. Disco, Occasionally 6 მარტს გამოვა. ალბომის წამყვანი სინგლი, სახელწოდებით Aperture კი 22 იანვარს გამოქვეყნდა.
სტაილსიც და Doechii-ც ამერიკის ხმისჩამწერი აკადემიის დაჯილდოების გამარჯვებულები არიან, – სტაილსმა 2021 წელს „საუკეთესო პოპ-სოლო შესრულების“ კატეგორიაში გაიმარჯვა. მას გრემი გადაეცა Billboard Hot 100-ის ჰიტისთვის – Watermelon Sugar, ხოლო 2023 წელს Harry’s House-ისთვის „წლის ალბომისა“ და „საუკეთესო პოპვოკალური ალბომის“ ჯილდოები მიიღო. ორივე ალბომი Billboard 200-ის ჩარტის ლიდერი იყო. Doechii-მ გასულ წელს „საუკეთესო რეპალბომის“ ჯილდო მოიგო ნამუშევრით Alligator Bites Never Heal. 2026 წელს ის ხუთ კატეგორიაშია ნომინირებული ჰიტით Anxiety. არტისტი წარდგენილია ისეთ ნომინაციებში, როგორიცაა: „წლის ჩანაწერი“, „წლის სიმღერა“, „საუკეთესო მუსიკალური ვიდეო“, „საუკეთესო რეპსიმღერა“ და „საუკეთესო რეპშესრულება“.
Grammy Awards-ის 68-ე ცერემონია პირდაპირ ეთერში კვირას, 1-ელ თებერვალს, CBS-ზე გადაიცემა და ასევე პირდაპირ ტრანსლაციას უზრუნველყოფს Paramount+. შოუს წამყვანი ტრევორ ნოა იქნება. ამით ის გახდება ენდი უილიამსის შემდეგ პირველი ადამიანი, რომელმაც გრემის ზედიზედ ექვსი ცერემონია წაიყვანა. უილიამსმა 1971-77 წლებში შვიდი ცერემონია წაიყვანა.
2026 წლის Grammy Awards-ის დამატებითი შემსრულებლები უახლოეს დღეებში გამოცხადდება.
