მუსიკაში, მოდასა და კინოში წარმატების მიღწევისა და გავლენის მოპოვების შემდეგ, როკის შემდეგი ნაბიჯი შესაძლოა პოლიტიკა იყოს. A$AP Rocky-მ Esquire-თან ინტერვიუში ნიუ-იორკის მერის პოსტზე კენჭისყრის შესაძლებლობაზე ისაუბრა. როკი მიიჩნევს, რომ თანამდებობისთვის მზადაა. „რა თქმა უნდა,“ – უპასუხა მან კითხვას, ხედავს თუ არა საკუთარ თავს პოლიტიკაში. „მგონია, რომ დიახ. ბევრი პოლიტიკური საკითხია მოსაგვარებელი და ცვლილებებია საჭირო. ვფიქრობ, ამ საქმეს კარგად გავართმევდი თავს, რადგან ხალხის მხარეს ვარ.“
როკიმ ყურადღება გაამახვილა ნიუ-იორკში არსებულ პრობლემებზე – ინფრასტრუქტურის გაუმართაობაზე, ორმოებით სავსე გზებზე, მატარებლის ბილეთების მაღალ ფასებზე, აშშ-ის სოციალური დახმარების პროგრამის ბიუჯეტის შემცირებასა და ჯანდაცვაზე.
„ხედავ ორმოებს – უნდა შეაკეთო. მატარებლის ტარიფები? ბილეთი 3 დოლარამდე გაიზარდა – ეს სიგიჟეა. ინფლაცია უკონტროლოა. სოციალური დახმარების პროგრამები და საკვები ვაუჩერები პრობლემური საკითხია, რადგან ეს არის ის რეალობა, საიდანაც მე მოვდივარ. მეტი სამუშაო ადგილის შექმნა და უკეთესი ჯანდაცვაა საჭირო,” – თქვა არტისტმა.
მისი თქმით, ეს ის დაპირებებია, რომლითაც პოლიტიკოსები ხშირად გამოდიან, თუმცა რეალურად მათი ქმედებები ხშირად ფარული ინტერესებისა და პირადი სარგებლისკენ არის მიმართული.
A$AP Rocky-ს თქმით, როგორც შეძლებული ადამიანი, რომელმაც ფინანსური წარმატება პოლიტიკის მიღმა მოიპოვა, ის არ აღმოჩნდება იმ ხაფანგებში, რომლებშიც სხვა პოლიტიკოსები ებმებიან თანამდებობაზე მოსვლის შემდეგ. „2029 წელს ხმა მიეცით მერს,“ – მიმართა მან ნიუ-იორკელებს. „მიეცით ხმა როკის.“
ამჟამად ზოჰრან მამდანისათვის ნიუ იორკის მერის პოსტზე ყოფნის პირველ წელია და ჯერჯერობით უცნობია, შეეცდება თუ არა მეორე ვადით არჩევნებში მონაწილეობის მიღებას. მამდანიმ 2025 წლის მერის არჩევნებში ხმების 50.78% მოიპოვა. მან ნიუ-იორკის ყოფილი დემოკრატი გუბერნატორი ენდრიუ კუომო და კერტის სლივა დაამარცხა.
რაც შეეხება A$AP Rocky-ს მუსიკალურ კარიერას, ის შვიდწლიანი პაუზის შემდეგ დაბრუნდა ალბომით – Don’t Be Dumb. ალბომმა პირველ კვირაში 123 000 ეკვივალენტური ალბომის გაყიდვით, Billboard 200-ის ჩარტში პირველი ადგილი დაიკავა.
ნახეთ A$AP Rocky-ს ინტერვიუ Esquire-თან:
