კორძი ახალ სინგლს აზიარებს, სახელწოდებით Family Love part 2. კომპოზიციაში მონაწილეობს მუსიკოსის დედა, პიანისტი თამარ კორძაია. ნაწარმოები შევა დედა-შვილის ერთობლივ ალბომში Find Me.
კომპოზიციას თან ახლავს მუსიკალური ვიდეოც, რომლის რეჟისორი ზაზა რუსაძეა. კლიპში წარმოდგენილია საარქივო მასალა და თანამედროვე კადრები, რომლებიც ძირითადად სატელევიზიო მედიის მუშაობასა და სამოქალაქო აქტივიზმს ასახავს.
„ძნელია, გაარჩიო, საქართველოს დღევანდელობა დროს აცდენილ კომპიუტერულ თამაშს უფრო ჰგავს თუ ზომბების შემოსევაზე გადაღებულ საშინელებათა ფილმს. თბილისის ქუჩებში მოძალადე რობოკოპები მშვიდობიან დემონსტრანტებს არბევენ; მიზნად დაუსახავთ შიშით დაგვაბრუნონ იმ ქვეყანაში, რომელიც უკვე დიდი ხანია, აღარ არსებობს. მკვდარი წარსული კი ჯერ კიდევ ცოცხალია – მეხსიერებაში და ტელევიზორის ეკრანებზე,” – წერს მუსიკოსი სოციარულ ქსელში.
Family Love part 2 მუსიკოსი დედა-შვილის მომავალი ალბომის რიგით მესამე კომპოზიციაა. ჩანაწერის სინგლების გამოქვეყნება მუსიკოსებმა დეკემბერში დაიწყეს.
„ყოველთვე გამოვუშვებთ თითო ტრეკს, სანამ ალბომი სრულად არ გამოვა. ეს იქნება მოგზაურობა ნაწარმოებების ნოტებით, ჩვენი და ჩვენი მეგობრების ვიდეოებით და სხვა,” – წერს კორძი ალბომის შესახებ.
