ქართულ მუსიკალურ სცენას ახალი საინტერესო პროექტი – Cupid’s Kiss შეუერთდა. ბენდის წევრები არიან: ლევან მიქელაძე – ბას გიტარა, სინთი, გიორგი ყველიაშვილი – ელექტრონული გიტარა, ელექტრონიკა, გიორგი კუზანაშვილი – ვოკალი, გიტარა, სინთი. Cupid’s Kiss-მა 21 იანვარს სადებიუტო სინგლი Same Mistakes წარადგინა, 2026 წელს კი პირველი ალბომის გამოცემას გეგმავს. მომდევნო სინგლის წარდგენა 21 თებერვალს არის დაგეგმილი. პროექტის იდეა წლების წინ კონსერვატორიაში სწავლის პერიოდში გაჩნდა, რასაც ბენდის ჩამოყალიბება მოჰყვა. Cupid’s Kiss მთლიანად საავტორო მუსიკაზეა აგებული და არტისტების შემოქმედებით გზას ახალი საფეხურიდან იწყებს.
ბენდის წევრი გიორგი კუზანაშვილი პროექტის შექმნის ისტორიასა და სამომავლო გეგმებზე Billboard საქართველოს უყვება:
„ეს პროექტი დიდი ხნის წინ, კონსერვატორიაში სწავლისას (სადღაც 2012-14 წლებში) დაწყებული კოლაბორაციის ახალ ეტაპს წარმოადგენს. მაშინაც ერთად ვუკრავდით, თუმცა სხვა სახელით. ჩემი გერმანიაში სწავლისა და ცხოვრების პერიოდში ბენდის იდეა უფრო მკაფიოდ ჩამოყალიბდა, როცა სწავლის პარალელურად სიმღერების წერაც დავიწყე. სწორედ იქ დაიწყო ამ პროექტზე მიზანმიმართული მუშაობა.
2024 წელს, გერმანიიდან დაბრუნების შემდეგ, მოვახერხეთ ამ იდეის გარშემო რესურსების გაერთიანება – ფაქტობრივად, წლების განმავლობაში დაგროვილი გამოცდილების აკუმულირება. ეს პროექტი სრულად საავტორო მუსიკაზეა დაფუძნებული და ჩვენი მუსიკალური ცხოვრების ახალი ეტაპია.“
საინტერესოა ბენდის სახელწოდების წარმოშობაც, რომელიც მითოლოგიური თემატიკით დატვირთულ კომპოზიციას უკავშირდება:
„რაც შეეხება ჯგუფის სახელს, ჩვენი ერთ-ერთი სიმღერა, სახელად Cupid’s Kiss, მითოლოგიურ თემატიკაზეა დაწერილი და მალევე იქცა ჩვენი მუსიკის ნიშად. თავდაპირველად ბენდისთვის სხვა სახელი გვქონდა შერჩეული, თუმცა სწორედ ამ სიმღერამ შეგვაცვლევინა აზრი და საბოლოოდ პროექტის სახელიც განსაზღვრა.“
Cupid’s Kiss 2016 წლისთვის სადებიუტო ალბომის გამოსაცემად ემზადება:
„ამჟამად აქტიურად ვმუშაობთ პირველ ალბომზე, რომლის გამოშვებას 2026 წელს ვგეგმავთ. კონკრეტული თარიღი ჯერჯერობით უცნობია. უახლოეს მომავალში დაგეგმილი გვაქვს ლაივ სეშენის ჩაწერა Room 101-ში. ასევე 21 თებერვალს გამოვუშვებთ ახალ სინგლს. წელს ლაივ კონცერტების ჩატარებასაც ვგეგმავთ. ყველა სიახლეს და დეტალს ჩვენი მსმენელი სოციალური ქსელების საშუალებით შეიტყობს.“
სიმღერა Same Mistakes დაუსრულებელ შეცდომებზე გვიყვება, მუსიკალური რეფლექსია იმ ციკლს აღწერს, სადაც გულწრფელი გრძნობა ყოველთვის დანაკარგით სრულდება:
„სიმღერა მოგვითხრობს ადამიანზე, რომელსაც დიდი სიყვარულის უნარი აქვს, მაგრამ მას ყოველ ჯერზე კარგავს. Same Mistakes სწორედ იმ განმეორებად შეცდომებზეა, რომელიც ამ დიდ გრძნობას ახლავს.“
მოუსმინეთ Cupid’s Kiss-ის სადებიუტო სინგლს Same Mistakes:
