Tyler, the Creator 2026 წლის გრემის დაჯილდოებაზე წარდგება, რითაც ჰიპ-ჰოპის წარმომადგენლობა მუსიკის ამ გამორჩეულ საღამოს კიდევ უფრო გაიზრდება. უკვე ცნობილია, რომ შოუზე Clipse და Pharrell Williams-იც გამოვლენ.
აღსანიშნავია, რომ Pharrell Williams Clipse-ის ალბომის, Let God Sort Em Out-ის პროდიუსერია და მასში თავადაც მონაწილეობს. სწორედ ეს ნამუშევარია ნომინირებული წლის ალბომის კატეგორიაში.
სცენაზე ასევე ვიხილავთ ჰიპ-ჰოპის ლეგენდას, Ms. Lauryn Hill-ს. მისი ჩანაწერი (The Miseducation of Lauryn Hill, 1999) ისტორიაში პირველი ჰიპ-ჰოპ ალბომი გახდა, რომელმაც „წლის ალბომის“ კატეგორიაში გაიმარჯვა. Ms. Lauryn Hill-ის გამოსვლა ორი არტისტის ხსოვნას მიეძღვნება, რომლებიც გასულ წელს გარდაიცვალნენ: Roberta Flack და D’Angelo-ს.
34 წლის Tyler, the Creator წელს ექვს ნომინაციაშია წარდგენილი: წლის ალბომი, საუკეთესო რეპალბომი და საუკეთესო გარეკანი Billboard 200-ის ლიდერი ჩანაწერისთვის CHROMAKOPIA, საუკეთესო ალტერნატიული მუსიკის ალბომი ნამუშევრისთვის DON’T TAP THE GLASS, რომელიც ასევე Billboard 200-ის ლიდერი გახდა, საუკეთესო რეპშესრულება სიმღერისთვის Darling, I (Teezo Touchdown-ის მონაწილეობით) და საუკეთესო რეპსიმღერა – Sticky-სთვის (GloRilla, Sexyy Red და Lil Wayne-ის მონაწილეობით).
ერთდროულად რეპისა და ალტერნატიული მუსიკის კატეგორიებში მიღებული ნომინაციები Tyler-ის შემოქმედებით მრავალფეროვნებაზე მიუთითებს. თუმცა მსგავსი პრეცედენტი მუსიკის ისტორიაში ადრეც ყოფილა: 1999 წელს Beastie Boys-ის Billboard 200-ის ლიდერმა ალბომმა Hello Nasty საუკეთესო ალტერნატიული მუსიკის ნომინაციაში გაიმარჯვა, ხოლო ამავე ალბომის ჰიტმა, Intergalactic, საუკეთესო რეპშესრულების ჯილდო მოიპოვა (დუეტის და ჯგუფების კატეგორიაში).
სცენაზე ასევე წარდგებიან: ედისონ რეი, ალექს უორენი, ენდრიუ უატი, ჩედ სმითი, დაფ მაკაგანი, ჯასტინ ბიბერი, KATSEYE, Lady Gaga, ლეონ ტომასი, ლოლა იანგი, ლუკას ნელსონი, Post Malone, რება მაკენტაირი, ROSÉ, საბრინა კარპენტერი, Slash, sombr და The Marías.
რიგით 68-ე გრემის ყოველწლიური დაჯილდოება პირდაპირ ეთერში 1 თებერვალს CBS-ზე გადაიცემა, შოუს ნახვა შესაძლებელი იქნება Paramount+-ზეც.
ენდი უილიამსის შემდეგ, რომელიც 1971-1977 წლებში შვიდ პირდაპირ ეთერს უძღვებოდა, კომიკოსი ტრევორ ნოა პირველი ადამიანი გახდება, რომელიც ზედიზედ ექვს გრემის ტრანსლაციას წაიყვანს.
2026 წლის გრემის დაჯილდოებას Recording Academy-სთვის Fulwell Entertainment აწარმოებს, მისი აღმასრულებელი პროდიუსერები კი ბენ უინსტონი, რაჯ კაპური, ჯესი კოლინზი და ტრევორ ნოა არიან.
