„ქართული მუსიკალური მემკვიდრეობა” ბოლო წლებში თანმიმდევრულად ქართული ალტერნატიული სცენის არქივაციაზე მუშაობს, რომელიც ამჯერად ყურადღებას ელექტრონული მუსიკის ერთ-ერთ ფუნდამენტურ ფიგურაზე ამახვილებს.
პროექტ „ქართული მუსიკალური მემკვიდრეობის” ფარგლებში, 2026 წლის 14 მარტს ნატალია ბერიძის (TBA) საკულტო ალბომის, Annule-ის ვინილის პრეზენტაცია Mutant Radio-ს სივრცეში გაიმართება.
ნატალია ბერიძე (TBA) ექსპერიმენტული ელექტრონიკის პიონერი და გაერთიანება Goslab-ის საკვანძო ფიგურაა. მისი შემოქმედება IDM-ს, ემბიენტსა და ვოკალურ ექსპერიმენტებს აერთიანებს, ნატალია ბერიძე წლების განმავლობაში თანამშრომლობდა ისეთ არტისტებთან, როგორებიც არიან რიუიჩი საკამოტო და თომას ბრინკმანი.
2005 წელს გამოცემული ალბომი Annule ნატალია ბერიძის კარიერაში გარდამტეხ ეტაპად ითვლება, ეს იყო პროექტი, რომელმაც ქართული ელექტრონული მუსიკის ახალი ესთეტიკა ჩამოაყალიბა.
„ქართული მუსიკალური მემკვიდრეობა“ ნათია სართანიასა და ჯაბა შავიშვილის მიერ შექმნილი პროექტია, რომლის მიზანი ადრეული 90-იანი და 2000-იანი წლების მუსიკალური ნაწარმოებების კვლევა და მათ ვინილის სახით გამოცემაა. კოლექცია აერთიანებს მუსიკოსებს, რომლებიც ფუნდამენტურ როლს ასრულებენ ქვეყნის თანამედროვე მუსიკალური იდენტობის ფორმირებაში.
