Meme-მ სოციალურ ქსელში თიზერი გამოაქვეყნა, რომლითაც მოკლემეტრაჟიანი მუსიკალური ფილმი დააანონსა. როგორც ვიდეოს აღწერაში არტისტი წერს, ეს ვიზუალური ნამუშევარი მისი ცხოვრების ბოლო ორ წელს ასახავს. ფილმი, სახელწოდებით All The Things, ასევე გააერთიანებს იმ მნიშვნელოვან პროექტებს, რომლებზეც მუსიკოსმა ამ პერიოდის განმავლობაში იმუშავა.
პროექტის ფარგლებში Meme-მ მუსიკალურ პროდიუსერ Denivarlevy-სთან ითანამშრომლა, რომელთანაც არაერთი კოლაბორაცია აკავშირებს. ფილმის პროდიუსინგი Papa Production-ს ეკუთვნის.
2025 წელს Billboard Georgia-მ Meme-სთან ინტერვიუ ჩაწერა. როგორც არტისტმა აღნიშნა, მუსიკა მისთვის ექსპერიმენტების სივრცეა, რომელიც თავისუფალია ჟანრობრივი საზღვრებისგან:
„ჩემი აზრით, ყველაზე მნიშვნელოვანი არის, რომ არ შეიზღუდო თავი ჟანრობრივად. რაც უფრო მეტს უსმენ, რაც მეტ ჟანრსა და მიმდინარეობას ეცნობი, მით უფრო მკაფიოდ იკვეთება შენი გემოვნება და ხასიათი შემოქმედებაში.”
