Charli xcx-მა უპასუხა კრიტიკას, რომელიც ბერლინში, ფილმ The Moment-ის პრემიერის შემდგომ წვეულებაზე მის დასწრებას მოჰყვა. კრიტიკა გამოიწვია გავრცელებულმა ინფორმაციამ, რომ წვეულების ორგანიზატორს რუსეთის მთავრობასთან სავარაუდო კავშირები აქვს. 19 თებერვალ Instagram Story-ში გამოქვეყნებულ მიმართვაში პოპვარსკვლავმა აუდიტორიას მიმართა:
„მინდა ვთქვა, რომ არც მე და არც ჩემმა გუნდმა არაფერი ვიცოდით ბერლინის წვეულების ირგვლივ არსებულ სავარაუდო კავშირებზე. მინდა გამოვიყენო ეს შესაძლებლობა და განვაცხადო, რომ ვგმობ რუსეთის მთავრობის მიერ უკრაინაში ჩადენილ სისასტიკეს და სოლიდარობას ვუცხადებ უკრაინელ ხალხს“.
ჩარლის პოსტი მას შემდეგ გამოქვეყნდა, რაც United24 Media-მ გაავრცელა ინფორმაცია, რომ 14 თებერვალს ბერლინალეს კინოფესტივალზე ფილმის პრემიერის შემდეგ გამართულ წვეულებას რუსი მოდელი და დიჯეი ანასტასია შევცოვა მასპინძლობდა. გამოცემის თანახმად, ანასტასია ჟანა შევცოვას ქალიშვილია, რომელიც რუსეთის მთავრობის მიერ დაფინანსებული ფონდის Traditsiya-ს პრეზიდენტია. გავრცელებული ინფორმაციით, აღნიშნული ფონდი რუსეთის კულტურის პოპულარიზაციას ეწევა.
ეს ოჯახური კავშირი ბევრისთვის პრობლემა აღმოჩნდა, რადგან რუსეთი 2022 წელს უკრაინაში შეიჭრა, რასაც უამრავი ადამიანი ემსხვერპლა და მილიონობით უკრაინელი დევნილად იქცა.
Instagram-ზე განცხადება ასევე გაავრცელა ანასტასია შევცოვამ, რომელმაც უარყო ყოველგვარი პოლიტიკური თუ სხვა სახის კავშირი კონფლიქტთან. „ჩემი ოჯახის წევრები ცხოვრობენ რუსეთში, ბელარუსსა და უკრაინაში,” – დაწერა წვეულების მასპინძელმა და აღნიშნა, რომ ბოლო ოთხი წელია, ევროპაში ცხოვრობს და მუშაობს. მისი თქმით, ომის „ტრაგედია პირადად ეხება”.
რაც შეეხება ფილმს – The Moment, სადაც ჩარლი საკუთარი თავის ვერსიას თამაშობს და მოულოდნელად მოპოვებულ პოპულარობასთან გამკლავებას ცდილობს, აშშ-ის კინოთეატრებში 30 იანვარს გამოვიდა. ბერლინალეზე ფილმის მსოფლიო პრემიერისას ჩარლიმ დაადასტურა, რომ The Moment მისი ბოლო მუსიკალური ეპოქის დასკვნითი ნაწილია. „ეს ჰგავს Brat-ის სამყაროს დიდი ხნის დაგვიანებულ ფინალურ წერტილს. ეს თავიდანვე ვიცოდით და ფილმის გადაღების ერთ-ერთი მიზეზიც სწორედ ეს იყო. ასე რომ, მზად ვარ ახალი მოგზაურობის დასაწყებად, თუმცა ჯერ არ ვიცი, რა იქნება ეს. იდეებისთვის ღია ვარ,” – განმარტა Charli xcx-მა.
