Rosé-სა და ბრუნო მარსის სინგლი, სახელწოდებით – APT ფონოგრამების ინდუსტრიის საერთაშორისო ფედერაციამ (IFPI) 2025 წლის ყველაზე გაყიდვად გლობალურ სინგლად დაასახელა. დღევანდელი განცხადების თანახმად, ამ კოლაბორაციამ რამდენიმე მიმართულებით დაამყარა რეკორდი: ის გახდა პირველი No.1 სინგლი არაინგლისურენოვანი ტექსტით და პირველი გამარჯვებული გლობალურ ჩარტში, რომლის შემსრულებლებიც არ არიან ჩრდილოეთ ამერიკასა და ევროპაში დაფუძნებული არტისტები.
IFPI ამ შედეგს წარმატებულ გლობალურ კამპანიას უკავშირებს, რომელმაც რადიო და სტრიმინგ სერვისები სხვადასხვა რეგიონის მასშტაბით მოიცვა. ეს დაეხმარა ტრეკს, დიდხანს შეენარჩუნებინა პოპულარობა და 45 კვირის განმავლობაში დარჩენილიყო Hot 100-ის ჩარტში, სადაც მე-3 ადგილს მიაღწია.
APT ბრუნო მარსისთვის პირველი No.1 ტრეკია IFPI-ის გლობალური სინგლების ჩარტში 2011 წლის Just The Way You Are-ის შემდეგ.
19 თებერვალს გამოქვეყნებული მონაცემებით, კალენდარული წლის განმავლობაში APT-ის ანგარიშზე 2.06 მილიარდი ერთეულია, რაც მოიცავს ფასიან სტრიმინგს, სარეკლამო პლატფორმებსა და ციფრულ გაყიდვებს.
„Rosé-სა და ბრუნო მარსის მიერ IFPI-ის გლობალური ჩარტის სათავეში APT-ით მოხვედრა გარდამტეხი მომენტია,“ – განაცხადა IFPI-ის აღმასრულებელმა დირექტორმა ვიქტორია ოკლიმ. „წლევანდელი შედეგები ხაზს უსვამს თანამედროვე მუსიკალური ბაზრის მასშტაბებს, სადაც სიმღერები ენებსა და საზღვრებს აერთიანებს“.
რეიტინგში მეორე ადგილი დაიკავა HUNTR/X-ის Golden-მა. 2025 წლის საუკეთესო ათეულმა კიდევ ერთხელ გამოკვეთა კოლაბორაციების დომინირება: ბრუნო მარსისა და ლედი გაგას Die With A Smil-მა მე-4 ადგილი დაიკავა, ხოლო კენდრიკ ლამარისა და SZA-ს luther-მა – მე-8 ადგილი.
ასევე შთამბეჭდავი შედეგი აჩვენა ალექს უორენმა: მისი სიმღერა Ordinary მე-3 ადგილზეა. სხვა ახალბედებს შორის არიან გრეისი აბრამსი სიმღერით That’s So True (მე-9 ადგილი), sombr – back to friends (მე-16 ადგილი) და რეივენ ლენეი – Love Me Not (მე-20 ადგილი). ამასთანავე, IFPI-ის წლის გლობალური შემსრულებელი ტეილორ სვიფტი მე-19 ადგილზეა სიმღერით – The Fate of Ophelia. ამ შედეგით, სვიფტი გლობალური არტისტების ჩარტის სათავეში ზედიზედ მეოთხედ (და ჯამში მეექვსედ) მოექცა.
