მარტის თვეში Tatuza მსმენელს, ტრადიციულად, მრავალფეროვან პროგრამას სთავაზობს. მთელი თვის განმავლობაშის ჯაზკლუბის სცენა ქართველი და უცხოელი ვარსკვლავების საღამოებს უმასპინძლებს.
გაზაფხულის სეზონს პირველ მარტს ბექა გოჩიაშვილის ტრიო გახსნის. ხანგრძლივი პაუზის შემდეგ მუსიკოსი მსმენელის წინაშე აკუსტიკური კონცერტით დაბრუნდება და სცენაზე ბენდის წევრებთან, ფელიპე არსესა და მარკ ჯონსონთან ერთად წარდგება.
გრძელდება პროექტი „ახალი თვე ახალი ბენდი”. ამჯერად Tatuza-ს მარტის რეზიდენტი ბენდი პიტერ მედსენის კვარტეტი იქნება. ერთი თვის განმავლობაში ჯაზკლუბის სცენაზე მუსიკოსები ჯამში 14 საღამოს გამართავენ.
პიტერ მედსენი ამერიკელი პიანისტი და კომპოზიტორია. ის 600-ზე მეტი კომპოზიციის ავტორია და მონაწილეობა აქვს მიღებული 160-ზე მეტ ჩანაწერში. მედსენი მრავალი წლის განმავლობაში ცხოვრობდა და მუშაობდა ნიუ-იორკში, სადაც თანამშრომლობდა ჯაზის ლეგენდებთან, მათ შორის სტენ გეტცთან, კენი გარეტთან, ჯო ლოვანოსა და სხვებთან. კვარტეტის შემადგენლობაში ასევე არიან: ჯერემი სანდფელდერი (ტენორ საქსოფონი, კლარნეტი), შონ ბერკი (ბასი) და ალექს ჯონსონი (დრამი).
ტრადიციულად, რეზიდენტი ბენდების გვერდით ჯაზკლუბი ქართველ და საერთაშორისო ვარსკვლავებსაც მასპინძლობს. ბექა გოჩიაშვილთან ერთად მარტის თვის ქართველი მუსიკოსები იქნებიან: ოთარ მაღრაძის ტრიო, ხატია ქორიძის კვარტეტი, ანა ჟორდანიას კვარტეტი, Geo Band, თემურიკო დიასამიძე და ლუკა თოფურია, ასეევე ლუკა თოფურიას ტრიო და კვინტეტი.
რაც შეეხება საერთაშორისო მუსიკოსებს, მარტში Tatuza-ს ვარსკვლავი ჯაზბასისტი ვინსენ გარსია ეწვევა. მუსიკოსი ჯაზკლუბში 27 და 28 მარტს ორ კონცერტს გამართავს. ვინსენ გარსია თანამედროვე ჯაზისა და ფანკის ერთ-ერთი გამორჩეული ბასისტია, რომელიც ენერგიული შესრულების სტილითა და თანამედროვე ჟღერადობითაა ცნობილი.
მარტის პროგრამას 29 მარტს კვლავ თვის რეზიდენტი ბენდი, პიტერ მედსენის კვარტეტი დახურავს.
