ამ თვის დასაწყისში უიტნი ჰიუსტონის სიმღერის, I Have Nothing-ის მუსიკალურმა ვიდეომ YouTube-ზე მილიარდ ნახვას მიაღწია. აღსანიშნავია, რომ ეს კომპოზიცია მომღერლის 1992 წლის კინოდებიუტის, The Bodyguard-ის საუნდტრეკის მესამე სინგლია.
I Will Always Love You-სა და I’m Every Woman-ის ტრიუმფის შემდეგ გამოცემულმა სიმღერამ I Have Nothing – Billboard Hot 100-ის ჩარტში მე-4 ადგილი დაიკავა. ამავდროულად, ფილმის საუნდტრეკი Billboard 200-ის ალბომების ჩარტის სათავეში 20 კვირის განმავლობაში იმყოფებოდა. დღეისათვის კი, RIAA-ს მიერ ყველა დროის ყველაზე მაღალრეიტინგულ საუნდტრეკად არის აღიარებული.
I Have Nothing უიტნი ჰიუსტონისთვის ფილმ The Bodyguard-ის საუნდტრეკიდან რიგით მეორე მუსიკალური ვიდეოა, რომელიც YouTube-ის ე.წ. „მილიარდ ნახვათა კლუბს“ შეუერთდა. რაც შეეხება მის კიდევ ერთ მეგაჰიტს, დოლი პარტონის სიმღერის ქავერს I Will Always Love You, ამ დროისთვის მას 1.8 მილიარდზე მეტი ნახვა აქვს და შესაძლოა, უახლოეს თვეებში 2 მილიარდიან ნიშნულსაც გადააჭარბოს.
როგორც ჩანს, Have Nothing სრულიად ბუნებრივად ინარჩუნებს აქტუალობას: სიმღერა ამჟამად არც სოციალურ ქსელებშია ტრენდული და არც რომელიმე პოპულარულ სერიალსა თუ ფილმში გაჟღერებულა. ეს ბალადა ვოკალური ოსტატობის ნამდვილი მასტერკლასია, მისი ხანგრძლივი წარმატება კი ჰიუსტონის უკვდავ მემკვიდრეობაზე მეტყველებს.
ნახეთ უიტნი ჰიუსტონის უკვდავი ჰიტის, I Have Nothing-ის მუსიკალური ვიდეო:
