25 თებერვალს ბრიტანი ბროსკის შოუს – Royal Court-ის ახალი ეპიზოდი გამოქვეყნდა. ჰარი სტაილსმა გაამხილა, რომ ის იყენებს Raya-ს – დახურულ პლატფორმას გაცნობისათვის. მომღერალმა ეს მაშინ ახსენა, როდესაც რომში გატარებული დროისა და იტალიური ენის შესწავლის შესახებ საუბრობდა. ენის პრაქტიკაზე საუბრისას მან აღნიშნა: „ძირითადად მეგობრებთან ვსაუბრობ, თუმცა შიგადაშიგ აპლიკაციასაც ვიყენებ – Raya-ს“.
ამის შემდეგ კი დაამატა: „მხოლოდ გრამატიკისთვის და მსგავსი რაღაცებისთვის.”
ინტერვიუს გამოსვლიდან დაახლოებით ერთ კვირაში, 6 მარტს, მუსიკოსის მეოთხე სტუდიური ალბომი – Kiss All the Time. Disco, Occasionally გამოვა.
ინტერვიუს სხვა ნაწილში სტაილსმა გაამხილა, რომ მისი ფარული ნიჭი დიდი რაოდენობით იოგურტის ჭამაა. „არა, მართლა საოცრად ბევრ იოგურტს ვჭამ. ეს ჩემს მეგობრებს შოკში აგდებს,” – თქვა მან. სტაილსმა ასევე ისაუბრა 2010-იანი წლების იმიჯზე, რომელსაც ყველაზე მეტად ნანობს: „ვფიქრობ, ძალიან, ძალიან ვიწრო ჯინსებს ვატარებდი. ისინი ჩემს ფეხებზე ვიწრო იყო. ახლა საკუთარ თავს ვეტყოდი: ერთი ზომით, ან სამი ზომით დიდი ჩაიცვი“.
სტაილსმა ასევე ისაუბრა Rosalía-ს ალბომზე – Lux. „ვფიქრობ, შესანიშნავია, გენიალური. შთამაგონებელია, როცა ხედავ ისეთ პროექტს, როგორიცაა Lux. აშკარაა, რომ ის [Rosalía] შინაგან სურვილს მიჰყვა, ჩვენ კი ამ ყველაფერს თვალს ვადევნებთ“.
ჯერჯერობით, გულშემატკივრებისთვის ალბომიდან Kiss All the Time. Disco, Occasionally მხოლოდ ერთი სიმღერაა ცნობილი. სინგლი – Aperture თებერვლის დასაწყისში გამოქვეყნდა და Billboard Hot 100-ის სათავეშიც მოხვდა.
