ჯგუფმა „მგზავრები“ და ჰიპ-ჰოპ არტისტმა TAHA-მ (გიორგი იზორია) ერთობლივი სიმღერა ჩაწერეს, სახელწოდებით „სახლი“. ეს არის პროექტი, რომელიც სხვადასხვა ჟანრისა და თაობის არტისტებს აერთიანებს.
„მგზავრების“ ფრონტმენი გიგი დედალამაზიშვილი Billboard საქართველოსთან აღნიშნავს, რომ იდეა ამ კოლაბორაციის შესახებ დიდი ხანია, ჰქონდა, საბოლოოდ კი თანამშრომლობა ბუნებრივად შედგა.
„პირველ რიგში მინდა ვთქვა, რომ პირადად მე ყოველთვის ძალიან მომწონდა ის, რასაც გიორგი (TAHA) აკეთებს. ვფიქრობ, ის საქართველოში ერთ-ერთი ყველაზე ნიჭიერი ახალგაზრდაა, მისი შემოქმედება ყოველთვის გამოირჩევა სიღრმითა და გულწრფელობით.“
მუსიკოსების გზები პირველად თსუ-ს ღონისძიებაზე გადაიკვეთა, სადაც ერთად დაუკრეს. სწორედ იქ დაიწყო მათი პროფესიული ურთიერთობა, რომელიც, როგორც გიგი აღნიშნავს, ძალიან თბილად და ბუნებრივად ჩამოყალიბდა.
„მას შემდეგ სულ ვფიქრობდი, ხომ არ გაგვეკეთებინა რაიმე ერთად. ზოგადად ძალიან მიყვარს სხვადასხვა ჟანრის შერწყმა, ჩემთვის განსაკუთრებით საინტერესოა ისეთი კოლაბორაცია, რომელიც ერთი შეხედვით წარმოუდგენლიც კი ჩანს.“
საბოლოოდ, ამ ექსპერიმენტების იდეა ორივე არტისტისთვის საინტერესო აღმოჩნდა:
„ყველაზე საინტერესო კი ის იყო, რომ მანამდე არც მე მქონდა რაიმე დაწერილი და არც მას, ყველაფერი სუფთა ფურცლიდან დავიწყეთ. სამუშაო პროცესში სამი-ოთხჯერ შევხვდით, თუმცა იშვიათია, ასე მარტივად და ბუნებრივად შეიქმნას რამე.“
აღსანიშნავია ის ფაქტიც რომ სიმღერაში გამოყენებულია ქართული ფოლკლორული საკრავი ჭიპონი, რომელიც არა მისი ტრადიციული, არამედ გათანამედროვებული ჟღერადობით არის წარმოდგენილი, რაც სიმღერას დამატებით ავთენტურობას და მრავალფეროვნებას სძენს.
„დიდი ხანია, მქონდა იდეა, რომ ეს ინსტრუმენტი სიმღერაში გამოგვეყენებინა, ოღონდ არა მისი სტერეოტიპული ფორმით. როცა გიორგი მოვიდა, ვკითხე, რას ფიქრობდა ამაზე. ჩვენმა ჯგუფის წევრმა, გუგამ, ჭიპონი აიღო, დაუკრა, ბიტი დავადეთ და სწორედ იქ დაიბადა სიმღერის ხასიათი. თითქოს თავისით მოვიდა სიმღერის ემოციაც. გვინდოდა თბილი სიმღერა შეგვექმნა, პირველ რიგში ჩვენთვის და შემდეგ პოზიტივი გაგვეზიარებინა მსმენელისთვისაც.” – აღნიშნავს გიგი.
ტექსტის შექმნის პროცესზე საუბრისას გიგი განსაკუთრებულად გამოყოფს TAHA-ს მუშაობის სტილს:
„გიორგი არის უნიჭერესი ადამიანი, ასე მარტივად და ასე სწრაფად ადამიანი მუშაობდეს ტექსტზე, მე არ მინახავს. პირველად რომ ჩაწერა, თავად არ მოეწონა, გადაწყვიტა, თავიდან დაეწერა და რამდენიმე წუთში სრულიად ახალი ტექსტი შექმნა, შევიდა და ჩაწერა. დღეს რასაც ვისმენთ, ფაქტობრივად ერთ წუთში დაწერილი ტექსტია.“ – გიგი დედალამაზიშვილი „მგზავრების” ფრონტმენი.
სიმღერასთან ერთად შეიქმნა ვიდეოკლიპიც, რომელიც ერთ დღეში, უწყვეტი კადრით გადაიღეს. კლიპი ფროდაქშენ კომპანია FILMORIUM PICTURES-ის და Zviad Kol-ის (ზვიად ციკოლიას) რეჟისორობით შეიქმნა. „ვიდეოზე ძალიან დიდი გადამღები ჯგუფი მუშაობდა და ყველას უღრმესი მადლობა მინდა გადავუხადო – ზვიადს პირველ რიგში”. – აღნიშნავს გიგი.
8 მარტს „თეატრში“ „მგზავრების“ სოლო კონცერტია დაგეგმილი, სადაც სცენაზე მათთან ერთად TAHA-ც წარდგება, აუდიტორია კი ამ კოლაბორაციას ცოცხლად პირველად მოისმენს.
„ჩემთვის ძალიან ემოციურია ის ფაქტი, რომ სხვადასხვა თაობას წარმოვადგენთ; ჩვენ შორის 15 წელია სხვაობა. მიუხედავად ამისა, ერთნაირად ვფიქრობთ და ერთი სათქმელი გვაქვს. და ეს ძალიან ემოციურია ჩემთვის.“ – აღნიშნავს გიგი დედალამაზიშვილი ჰიპ-ჰოპ არტისტ TAHA-ზე საუბრისას.
მოისმინეთ სიმღერა „სახლი” – „მგზავრებისა” და TAHA-ს კოლაბორაციული ნამუშევარი:
