მაილი საირუსი Hannah Montana-ს 20 წლის იუბილესადმი მიძღვნილ სპეციალურ შოუში გამოვიდა. თუმცა ამ მნიშვნელოვანი თარიღისთვის მან გულშემატკივრებს სიურპრიზიც მოუმზადა. 25 მარტს ვარსკვლავმა ინსტაგრამის საშუალებით ინფორმაცია გაავრცელა, სადაც აღნიშნულია, რომ ამ თარიღის აღსანიშნად ახალი სიმღერა Younger You გამოვა. სიმღერა საიუბილეო გადაცემის ფინალშიც შესრულდა, სტრიმინგ პლატფორმებზე კი ოფიციალურად 27 მარტს გამოქვეყნდება.
„Hannah Montana-ს იუბილე ჩემთვის მხოლოდ შოუსადმი პატივისცემის გამოხატვა არ არის, ეს არის მომენტი, როცა ჩემს ცხოვრებაში ყველაფერმა თავისი ადგილი იპოვა და ერთ წერტილში შეიკრა,“ – წერს მაილი საირუსი. „ეს სერიალი იყო იმ ცხოვრების დასაწყისი, რომლითაც დღეს ვცხოვრობ.“
აღსანიშნავია, რომ ეს სიმღერა მხოლოდ სერიალის იუბილეს არ ეძღვნება: მაილი საირუსისთვის ეს არის ერთგვარი მადლიერების გამოხატვა გულშემატკივრების მიმართ, ვინც მის გვერდით დგანან იმ დღიდან, რაც მან 20 წლის წინ პირველად მოირგო Hanna Montana-ს როლი.
„კავშირი, რომელიც ჩემსა და ჩემს გულშემატკივრებს შორის არსებობს, ისეთივე იშვიათი და მშვენიერია, როგორც მთელი ეს გზა. ყველანი ძალიან მიყვარხართ და გულით გაფასებთ. ეს საიუბილეო გამოშვება ჩემი საჩუქარია თქვენი ბავშვობისთვის, ეს არის გზა, რომლითაც მინდა მადლობა გადაგიხადოთ ერთგულებისთვის და იმისთვის, რომ ყოველ ნაბიჯზე ჩემთან ერთად იზრდებოდით.“ – წერს მაილი საირუსი პოსტში.
24 მარტს Hannah Montana-ს 20 წლის იუბილესადმი მიძღვნილმა სპეციალურმა შოუმ საირუსი და მისი გულშემატკივრები ისევ დააბრუნა Hannah Montana-ს სამყაროში. საიუბილეო პროგრამისთვის Disney-მ სპეციალურად აღადგინა სერიალის გადასაღები მოედნის ნაწილები, სადაც მაილი და მისი მშობლები ერთმანეთს შეხვდნენ. გადაცემაში სტუმრად მიწვეული იყო პოდკასტ Call Her Daddy-ს წამყვანი ალექს კუპერი, რომელმაც მაილისთან ინტერვიუ ჩაწერა.
სპეციალური გამოშვება ასევე მოიცავდა მაილი საირუსის პერფორმანსს: მან ცოცხალი აუდიტორიის წინაშე სერიალის ისეთი ჰიტები შეასრულა, როგორიცაა მთავარი საუნდტრეკი Best of Both Worlds და The Climb.
ნახეთ მაილი საირუსის პოსტი Younger You-ის ანონსით:
