25 მარტს ლოს ანჯელესის უმაღლეს სასამართლოში ივანა ლისეტ ორტისის პროცესი გაიმართა. 35 წლის ქალმა, რომელიც 8 მარტს რიანას ლოს-ანჯელესის სასახლის მიმართულებით სროლის ბრალდებით დააკავეს, თავი დამნაშავედ არ ცნო.
Reuters-ის ინფორმაციით, მან ადვოკატის მეშვეობით ასევე უარყო ბრალი ათზე მეტ დამატებით მძიმე დანაშაულში. ორტისს ბრალად ედება მარტის დასაწყისში რიანასა და A$AP Rocky-ს ლოს-ანჯელესის სახლის მისამართით ნახევრად ავტომატური იარაღიდან 10-ზე მეტი გასროლა, მაშინ, როდესაც ცნობილი წყვილი სამ შვილთან ერთად სახლში იმყოფებოდა.
სროლის შედეგად დაშავებულების შესახებ ინფორმაცია არ გავრცელებულა. როგორც პროკურორებმა განმარტეს, ოჯახი შემთხვევის დროს საკუთარ ეზოში, სამგზავრო ფურგონში იმყოფებოდა.
ივანა ლისეტს ჯამში წაუყენეს მკვლელობის მცდელობის ერთი მუხლი, ნახევრად ავტომატური ცეცხლსასროლი იარაღით თავდასხმის 10 მუხლი და დასახლებული ნაგებობის მიმართულებით სროლის 3 მუხლი.
ორტისის გირაო 1 875 000 აშშ დოლარით განისაზღვრა. დანაშაულის დამტკიცების შემთხვევაში, მას ფედერალურ ციხეში უვადო პატიმრობა ემუქრება. „ეს არის ქმედება, რომელსაც ადვილად შეიძლება მოჰყოლოდა მრავალჯერადი მკვლელობა,” – განაცხადა სასამართლოში პროკურორის მოადგილემ, ალექსანდრე ბოტმა.
სროლის შემდეგ ორტისი შემთხვევის ადგილიდან მიიმალა. ის ლოს-ანჯელესის პოლიციამ „ტესლას“ მარკის ავტომობილში მას შემდეგ დააკავა, რაც 8 მარტს 911-ზე შეტყობინება შევიდა.
ორტისი რამდენჯერმე იყო ნასამართლევი: 2013 წელს ფინანსური დანაშაულის საქმეზე დააკავეს, 2021 წელს – გაუფრთხილებელი მართვისთვის, ხოლო 2023 წელს – ოჯახური ძალადობისა და ფიზიკური შეურაცხყოფის ფაქტზე ეჭვმიტანილის სტატუსით.
მიუხედავად იმისა, რომ რიანასა და ორტისს შორის არავითარი კავშირი არ არსებობს, Los Angeles Times-მა აღნიშნა, რომ ორტისი Facebook-ზე მომღერლის შესახებ არაერთ პოსტს აქვეყნებდა. 17 თებერვალს მან გამოაქვეყნა „მიმი“, რომელშიც მიანიშნებდა, რომ რიანას სქესობრივი გზით გადამდები დაავადება ჰქონდა, ხოლო 23 თებერვალს დაწერა: „@badgirlriri აქ ხარ? ველოდებოდი, შენი შიდსით დაავადებული თავით როდის მეტყოდი რამეს პირდაპირ, იმის ნაცვლად, რომ ჩუმად მითვალთვალებდე და იქ ლაპარაკობდე ჩემზე, სადაც არ ვარ“.
