დამოუკიდებელი მუსიკალური კომპანიების ასოციაციამ (IMPALA) 2026 წლის მონაცემებით გამოაქვეყნა სია – „100 არტისტი, რომელსაც თვალი უნდა ადევნო“. ეს არის პროექტის მეხუთე გამოშვება, რომელიც YouTube-თან პარტნიორობითა და ევროკავშირის მხარდაჭერით ხორციელდება.
პროექტი მიზნად ისახავს იმ ნიჭიერი ევროპელი შემსრულებლების წარმოჩენას, რომლებიც დამოუკიდებელ ლეიბლებთან მუშაობენ. აქცენტი კეთდება მათ კრეატიულობაზე, მრავალფეროვნებასა და კომერციულ პოტენციალზე. YouTube და IMPALA ეხმარებიან ამ არტისტებს, რომ გასცდნენ საკუთარი ქვეყნის საზღვრებს და მოიპოვონ გლობალური აღიარება. სიაში მოხვდნენ არტისტები, რომლებიც თავიანთი ინოვაციური მიდგომებით გამოირჩევიან.
IMPALA ევროპის მასშტაბით არაერთ წამყვან ფაბლიშერს, ლეიბლსა და ინდუსტრიის სხვა წარმომადგენელს აერთიანებს. საქართველოდან ამ ორგანიზაციის წევრია GMI Rights Management. წელს IMPALA-ს ნომინანტების სიაში ვხვდებით ქართველ შემსრულებელსაც – სოლო არტისტ ნინი ნუცუბიძეს , VAQO-ს (ვახტანგ ქანთარია) და ჯგუფ MokuMoku-ს.
2026 წლის IMPALA-ს სიაში ნინი ნუცუბიძე მუსიკალური კომპანია Bloom Music-ის წარდგენით მოხვდა.
Billboard Georgia კომპანია Bloom Music-ის თანადამფუძნებელს – მირიან კულულაშვილს ესაუბრა:
„ყოველწლიურად IMPALA თავისი წევრების მიერ წარდგენილი კანდიდატებიდან 100 ყველაზე საინტერესო და პერსპექტიულ ევროპელ არტისტს არჩევს. ამ პროცესში ჩვენი კომპანია – Bloom Music-იც აქტიურადაა ჩართული და ყოველ წელს საკუთარ ფავორიტს ასახელებს. სწორედ ასე მოხვდა სიაში ნინი ნუცუბიძე, რომელიც, ჩვენი ღრმა რწმენით, მხოლოდ პერსპექტიული კი არა, უკვე შემდგარი ვარსკვლავია. დარწმუნებულები ვართ, მისი ნიჭი საერთაშორისო მედიისა და მუსიკალური ინდუსტრიის პროფესიონალების დიდ ყურადღებას მიიპყრობს. ამ სიაში ყოფნის მთავარი ბენეფიტიც სწორედ ეს არის – მოხვდე გლობალურ ფოკუსში, რაც არტისტისთვის უამრავ ახალ პერსპექტივასა და შესაძლებლობას აჩენს. ჩვენ გვჯერა, რომ ნინის წინ კიდევ არაერთი დიდი წარმატება ელის.“
ქართული მენეჯმენტ კომპანიების ჩართულობა საერთაშორისო ქსელებში პირდაპირ აისახება ადგილობრივი არტისტების აღიარებაზე.
„ჩვენთვის, როგორც მენეჯმენტისთვის, პრიორიტეტულია მსგავს საერთაშორისო პლატფორმებთან მუშაობა, რადგან ეს ქმნის ხიდს არტისტსა და იმ გლობალურ აუდიტორიას შორის, რომელიც მუდმივად ახალი, ინოვაციური ჟღერადობის ძიებაშია,” – ამბობს მირიან კულულაშვილი.
