ბრიტანელმა მუსიკოსმა და პროდიუსერმა, ჯეიმს ბლეიკმა მოითხოვა, რომ რეპერ Ye-ს (კანიე უესტი) ახალი ალბომის, Bully-ს კრედიტებიდან მისი სახელი ამოიღონ.
ბლეიკმა საკუთარ პლატფორმა Vault-ზე უპასუხა ფანების ეჭვს იმის შესახებ, გამოიყენა თუ არა რეპერმა ხელოვნური ინტელექტი ალბომის დასკვნით ტრეკში – This One Here.
პროდიუსერის თქმით, მას მიაჩნია, რომ საბოლოო ვერსიაში მისი შემოქმედებითი წვლილი აღარ იგრძნობა.
„ჩემი გაკეთებული ვოკალის დამუშავება და ტრეკის სტრუქტურა ნაწილობრივ შემორჩენილია, თუმცა მას ზემოდან სხვა ვოკალური პარტიები გადააწერეს,“ – განმარტა ბლეიკმა. „ჩემი ორიგინალი ვერსია სულ სხვა სულისკვეთების იყო. ახლანდელ ვარიანტში ჩემი პროდიუსირების კვალი თითქმის აღარ ჩანს.“
ბლეიკმა ხაზგასმით აღნიშნა, რომ ეს გადაწყვეტილება არ არის დაკავშირებული პირად წყენასთან ან რეპერის გარშემო არსებულ სკანდალებთან: „ეს პირადი საკითხი არ არის. უბრალოდ არ მსურს, ჩემი სახელი დაკავშირებული იყოს ისეთ მუსიკასთან, რომლის საბოლოო შედეგზეც გავლენა არ მქონია. არ მინდა, სხვისი ნამუშევრის ავტორობა მივიწერო.“
Billboard-მა კომენტარისთვის Ye-ს წარმომადგენელს მიმართა.
This One Here-ის ადრეული ვერსიის პრემიერა 2022 წლის სექტემბერში, ლონდონის მოდის კვირეულის ფარგლებში გამართულ ღონისძიებაზე შედგა. ბლეიკმა და Ye-მ მანამდე ერთად იმუშავეს ტრეკზე – Talking, რომელიც უესტისა და Ty Dolla $ign-ის 2024 წლის კოლაბორაციულ ალბომში – Vultures-ში შევიდა.
კანიემ ალბომი Bully სტრიმინგ სერვისებზე 28 მარტს წარადგინა. ალბომს მსმენელები ერთი დღით ადრე ელოდნენ. ეს LP უესტის პირველი სოლო ალბომია 2022 წლის Donda 2-ის შემდეგ.
რაც შეეხება ჯეიმს ბლეიკს, გრემის მფლობელმა პროდიუსერმა თავისი ალბომი – Trying Times 13 მარტს გამოუშვა.
