ჯაზის მოყვარულთათვის ერთ-ერთი საინტერესო და გამორჩეული მუსიკალური სივრცის – Tatuza Jazz Club-ის ოფიციალური პარტნიორი და მხარდამჭერი კომპანია „სილქნეტი“ გახდა. ეს თანამშრომლობა ქვეყნის კულტურული ეკოსისტემის გაძლიერებისთვის კიდევ ერთი წინ გადადგმული ნაბიჯი და ამავდროულად „სილქნეტის“ მრავალწლიანი ხედვის გაგრძელებაა.
კომპანია „სილქნეტი“ წლებია, მასშტაბურ პლატფორმებს ქმნის, რომლებიც საქართველოს საერთაშორისო კულტურულ სივრცეში პოზიციონირებას უწყობს ხელს, მათ შორის არის მსოფლიო მნიშვნელობის კლასიკური მუსიკის „წინანდლის ფესტივალი” და Billboard Georgia-ს დაფუძნება.
Tatuza Jazz Club, რომელიც სასტუმრო „ტელეგრაფის“ ერთგვარ სავიზიტო ბარათად იქცა, განსაკუთრებულ ისტორიას ატარებს: კლუბს ლეგენდარული ქართველი ჯაზმუსიკოსის, თამაზ ყურაშვილის (თათუზას) პატივსაცემად ეწოდა სახელი. მისი მრავალწლიანი ოცნება იყო, საქართველოში შექმნილიყო მსოფლიო სტანდარტების შესაბამისი ჯაზკლუბი, ადგილი, სადაც მუსიკა, აკუსტიკა და ატმოსფერო ერთიან, სრულყოფილ გამოცდილებად იქცეოდა. სწორედ ამ იდეის მატარებელია – Tatuza Jazz Club.
კლუბის უნიკალურობას არა მხოლოდ მუსიკალური პროგრამა, არამედ მისი ტექნიკური მახასიათებლებიც განსაზღვრავს. მთავარი ასპექტი აკუსტიკაა, რომელიც ფრანგმა არქიტექტორმა და აკუსტიკოსმა ქსავიე ფაბრმა შექმნა, ხოლო ტექნიკური ნაწილი მსოფლიო ლიდერებმა – L-Acoustics-მა და Meyer Sound-მა უზრუნველყვეს. შედეგად, სივრცე ერთდროულად პასუხობს როგორც პროფესიონალი მუსიკოსების, ისე მელომანი მსმენელის სტანდარტებს.
Tatuza Jazz Club ყოველთვიურად დაახლოებით 25-მდე ღონისძიებას მასპინძლობს და უკვე ჩამოყალიბდა, როგორც ადგილი, სადაც ჯაზის მოყვარულები მუდმივად იკრიბებიან. კლუბის სცენა მასპინძლობს როგორც საერთაშორისო აღიარების მქონე უცხოელ ჯაზმენებს, ისე გამორჩეულ ქართველ მუსიკოსებს, რომლებიც მსმენელს დაუვიწყარ მუსიკალურ სივრცეში ამოგზაურებენ.
აღსანიშნავია, რომ Billboard საქართველო დაარსების დღიდან აქტიურად და დეტალურად აშუქებს კლუბის ყველა მნიშვნელოვან სიახლეს, ივენთსა და კონცერტს, რაც მუსიკალურ სამყაროში ამ სივრცის ცნობადობას კიდევ უფრო მეტად ზრდის, როგორც ადგილობრივ, ისე საერთაშორისო აუდიტორიაში.
„სილქნეტისა“ და Tatuza Jazz Club-ის პარტნიორობა ჯაზის მოყვარულებს კიდევ ბევრ მასშტაბურ პროექტსა და აღმოჩენას ჰპირდება. ეს არის გარემო, სადაც ტრადიცია, ინოვაცია და თავისუფალი მუსიკა იდეალურად ერწყმის ერთმანეთს.
