Bedford Falls-მა ახალ სიმღერაზე –„უპირველეს ყოვლისა“ მუსიკალური ვიდეო წარადგინა. კლიპი ანიმაციური ნამუშევარია, რომელშიც ჯგუფის წევრებს ვხვდებით, მისი ავტორი კი ლევან გაგილაძეა. „უპირველეს ყოვლისა“ შესულია ბენდის სტუდიურ ალბომში Lazy Bones, რომელიც 12 ტრეკს აერთიანებს. ალბომი ქართულ დამოუკიდებელ ლეიბლ Stockton Records-ზე გამოიცა და ხელმისაწვდომია ყველა მუსიკალურ პლატფორმაზე.
2026 წლის 24 აპრილს მულტიფუნქციური სახელოვნებო სივრცის – Factory Tbilisi-ს ტერიტორიაზე Bedford Falls კონცერტს გამართავს. საღამო ახალ ალბომს ეძღვნება და ჯგუფი სწორედ Lazy Bones-ში შესულ სიმღერებს შეასრულებს.
Bedford Falls 2014 წელს შეიქმნა. ბენდის შემადგენლობაში არიან: დათო (ვოკალი), მიხო (გიტარა), სანდრო (დრამი და ბექვოკალი) და მიგრო (ბასი). შექმნისთანავე ჯგუფმა სწრაფად დაიმკვიდრა ადგილი სცენაზე და ერთ-ერთ გამორჩეულ მუსიკალურ კოლექტივად ჩამოყალიბდა.
ბენდის სახელწოდება შთაგონებულია ფრენკ კაპრას საკულტო ფილმით It’s a Wonderful Life, რომლის მოქმედებაც გამოგონილ ქალაქში – Bedford Falls-ში ვითარდება. ამ ქალაქის იდეა ჯგუფის იდენტობის მნიშვნელოვან ნაწილად იქცა, რადგან Bedford Falls არის ადგილი, სადაც ადამიანების ცხოვრება ერთმანეთთან მჭიდროდ არის დაკავშირებული.
