eZo Festival 2014 წელს დაარსდა და დღემდე თბილისის კულტურულ ცხოვრებაში მნიშვნელოვან ადგილს იკავებს. ღონისძიებებს ორგანიზებას Mzesumzira Community უწევს. ფესტივალის განუყოფელი ნაწილი მთაწმინდის პარკის გამწვანებული ტერიტორია იყო, თუმცა ამჯერად ორგანიზატორები ახალ სივრცეს ითვისებენ – ღონისძიება თბილისის ზღვის ტერიტორიაზე გაიმართება.
გასულ წელს eZo Festival-ის მიერ გავრცელებული ოფიციალური განცხადების თანახმად, ტერიტორია, სადაც ღონისძიებები იმართებოდა, თბილისის მიწათსარგებლობის გენერალური გეგმის მიხედვით, სატყეო ზონაში მოექცა, რის გამოც საიჯარო ხელშეკრულება აღარ გაგრძელდა და ფესტივალიც ძველ ლოკაციაზე აღარ ჩატარდა.
ორგანიზატორებმა ეს რთული პერიოდი ერთგვარ გარდამავალ ეტაპად აქციეს.
„ვუსმენდით ისე, თითქოს ბოლოჯერ, ვუკრავდით ისე, თითქოს დასრულდა, ვცეკვავდით, როგორც უკანასკნელად… მაგრამ მზე ამოვიდა – მზის ამოსვლისას ცეკვა გრძელდება…“ – აღნიშნულია ფესტივალის მიერ გამოქვეყნებულ პოსტში.
ლოკაციის ცვლილება ფესტივალის მასშტაბების ზრდასა და ახალ კონცეფციას გულისხმობს. ორგანიზატორები ახალ მუსიკალურ პროგრამას (ლაინაფს) სულ მალე გამოაქვეყნებენ. მიუხედავად რთული გამოწვევებისა, eZo Festival ამტკიცებს, რომ თანამედროვე მუსიკალური კულტურა საქართველოში კვლავ განაგრძობს განვითარებას და რომ ფესტივალის მთავარი ღირებულება არა კონკრეტული ადგილი, არამედ ის ემოციაა, რომელიც ივნისის დასაწყისში თბილისის ზღვის ტერიტორიაზე კვლავ გააცოცხლებს მუსიკის ფონზე მზის ამოსვლის ტრადიციას.
ფესტივალის ბილეთების შეძენა უკვე შესაძლებელია შემდეგ ბმულზე.
