18 აპრილს ჯასტინ ბიბერმა Coachella-ზე მეორე შოუ გამართა, რომლის განმავლობაში სცენაზე არაერთი სტუმარი მიიწვია, მათ შორის იყო მისი ერთ-ერთი ყველაზე დიდი ფანი – ბილი აილიში. ბიბერმა აილიში სცენაზე 2009 წლის ჰიტის, One Less Lonely Girl-ის შესრულებისას აიყვანა.
მუსიკალური ნომრის დროს არტისტები ბევრს იცინოდნენ და ერთმანეთს ეხვეოდნენ. შოუს ეს ნაწილი ბიბერის ადრეულ, YouTube-ის ეპოქის პერიოდს ეძღვნებოდა. პერფორმანსის დროს მან ბილი სკამზე დასვა და სიმღერა ისე მიუძღვნა.
ბილი აილიშს ადრეც უსაუბრია ბიბერთან მეგობრობაზე და აღუნიშნავს, რომ ჯასტინი მას კარიერის დასაწყისშივე დაეხმარა. „ის ჩემი კარგი მეგობარია,“ – თქვა აილიშმა 2020 წელს SiriusXM Hits 1-თან ინტერვიუში. „ის ძალიან დამეხმარა, რომ გამეგო, როგორ გავმკლავებოდი პოპულარობას. ხანდახან მირეკავს და ისეთ რაღაცებს მეუბნება, რაც მაგრძნობინებს, რომ ვიღაცას ჩემი ესმის და არსებობს სხვაც, ვინც იმავე გზას გადის, რასაც მე. ასე რომ, მისი მხარდაჭერა ძალიან სასიამოვნოა“.
Coachella-ს სეტის შემდეგ ნაწილში ბიბერმა სცენაზე SZA მიიწვია. მათ 2022 წლის სიმღერის, Snooze-ის აკუსტიკური დუეტი შეასრულეს. სცენაზე ასევე გამოჩნდა Sexyy Red, სიმღერა Sweet Spot-ის შესასრულებლად. გარდა ამისა, ჯასტინ ბიბერმა სცენაზე მოიხმო Big Sean, რომელთან ერთადაც As Long As You Love Me და No Pressure იმღერა.
12 აპრილს ბიბერმა 2026 წლის სტრიმინგების რეკორდული მაჩვენებელი დააფიქსირა. ეს მოხდა Coachella-ს პირველი უქმეების შემდეგ, სადაც ის ძირითადად 2025 წლის ალბომის, Swag-ის სიმღერებით და თავისი ადრეული ჰიტებით წარდგა. Luminate-ის მონაცემებით, იმ დღეს მან 24.6 მილიონი სტრიმი დააგროვა, რაც 2025 წლის ივლისის შემდეგ მისი ყველაზე მაღალი მაჩვენებელია.
