ქართველი არტისტი NEUX მუსიკალურ კარიერაში ახალ ეტაპს იწყებს. მან მსმენელს თავისი პირველი ტექნო ჩანაწერი, სახელწოდებით Silent წარუდგინა.
ნამუშევარი შესულია ლეიბლ Dusk Records-ის კრებულში Aftermath, რომელიც სხვადასხვა არტისტის ნამუშევარს აერთიანებს. ამ ეტაპზე კომპოზიცია ექსკლუზიურად ხელმისაწვდომია Bandcamp-ისა და SoundCloud-ის პლატფორმებზე.
რელიზთან ერთად NEUX-მა ახალი სამუშაო სივრცის ფოტოც გააზიარა. როგორც თავად აღნიშნავს, ეს სტუდია მისი შემოქმედების ახალი თავის დასაწყისია. არტისტის თქმით, ის ახლა ყველაზე მეტად გრძნობს კავშირს საკუთარ შინაგან შემოქმედებით ენერგიასთან.
„ფოტო, რომელსაც ხედავთ, ჩემს ახალ სტუდიაშია გადაღებული, სადაც ახალი თავი იწყება და წინ კიდევ ბევრი მუსიკა გველოდება. არასდროს მიგრძვნია ასეთი ახლო კავშირი ჩემში არსებულ შემოქმედთან და აღფრთოვანებული ვარ იმით, რაც არის ან რაც იქნება. ამ წელს უკვე მაქვს ორი საინტერესო ახალი პროექტი და ვინ იცის, იქნებ მეტიც. ვფიქრობ, ცხოვრებაში არა სრულყოფილება, არამედ მიმართულებაა მთავარი,” – წერს NEUX სოციალურ ქსელში.
