თბილისის სახელმწიფო კამერული ორკესტრი „საქართველოს სინფონიეტა“ სამხრეთამერიკულ ტურნეში მიემგზავრება. 9-დან 24 მაისამდე ორკესტრი ბრაზილიასა და არგენტინაში ცხრა კონცერტს გამართავს. ქართველი მუსიკოსები წარდგებიან ლათინური ამერიკის ისეთ პრესტიჟულ სცენებზე, როგორებიცაა რიო-დე-ჟანეიროსა და ბუენოს-აირესის წამყვანი საკონცერტო დარბაზები, მათ შორის – ლეგენდარული Teatro Colón. „საქართველოს სინფონიეტა“ პირველი ქართული ორკესტრია, რომელიც ბრაზილიასა და არგენტინაში დაუკრავს.
ტურნეში წასვლამდე ორკესტრი კონცერტებს საქართველოში გამართავს – 23 აპრილს გურჯაანის კულტურის ცენტრში, ხოლო 24 აპრილს თბილისის სახელმწიფო კონსერვატორიის დიდ დარბაზში. კონცერტებზე შედგება მსოფლიოში ცნობილი კრემონელი ოსტატების მიერ დამზადებული სიმებიანი საკრავების პრეზენტაცია, რომლებიც ორკესტრმა კულტურის სამინისტროს მხარდაჭერით შეიძინა. კონცერტის წინ, 18:30 საათზე, მსმენელს ახალი ინსტრუმენტების ახლოდან გაცნობის შესაძლებლობა მიეცემა, 19:00 საათიდან კი კანადელი დირიჟორის, მაესტრო ნურჰან არმანის ხელმძღვანელობით „საქართველოს სინფონიეტა“ ვივალდის, მოცარტის, ელგარის, შოსტაკოვიჩისა და სულხან ნასიძის ნაწარმოებებს შეასრულებს.
