ჯასტინ ბიბერმა Coachella-ს ფესტივალის მეორე გამოსვლაზე ჯასტინ ტიმბერლეიკის ჰიტი – Cry Me a River შეასრულა, რასაც თავად ტიმბერლეიკი გამოეხმაურა. 20 აპრილს მან ინსტაგრამზე ძველი ვიდეო გამოაქვეყნა, სადაც ჯერ კიდევ პატარა ბიბერს ხვდება.
„ვიცი, რომ ეს გრძელი გზა იყო და ისიც ვიცი, რომ ამ გზაზე სიარული ყოველთვის მარტივი არ ყოფილა . ვამაყობ შენით და შენც უნდა ამაყობდე საკუთარი თავით,” – წერს ტიმბერლეიკი პოსტის აღწერაში.
მათი შეხვედრის არქივთან ერთად, ტიმბერლეიკმა ბიბერის შაბათის პერფორმანსის ფრაგმენტიც გააზიარა. ვიდეოში ბიბერი ხალხს იმ სიმღერის შესახებ ესაუბრება, რომლის შესრულებასაც აპირებს: „იცით, მე ჯასტინ ტიმბერლეიკისა და სხვა არაერთი საოცრად ნიჭიერი არტისტის სიმღერებზე გავიზარდე. ეს ყველაფერი ისე მახსოვს, თითქოს გუშინ მოხდა.“
ამ დროს მომღერლის ზურგს უკან, დიდ ეკრანზე ჩანდა ვიდეო, სადაც ის პატარაობაში გიტარაზე Cry Me a River-ს ასრულებს. სიმღერის ეს ქავერ ვერსია, რომელიც ინტერნეტში დღემდე იძებნება, ბიბერის YouTube არხზე 2008 წლის თებერვალში აიტვირთა. მომდევნო წელს კი ბიბერის დებიუტი შედგა პირველი სინგლით One Time, რომელიც Billboard Hot 100-ის ჰიტი გახდა.
„გიტარა აწყობილი არ იყო,“ – ამბობს ბიბერი ვიდეოში, რის შემდეგაც ვიდეოს პარალელურად სიმღერის შესრულებს იწყებს.
Cry Me a River ჯასტინ ტიმბერლეიკის სადებიუტო სოლო ალბომის, Justified-ის მეორე სინგლი იყო. სიმღერამ Hot 100-ში მე-3 პოზიციას მიაღწია და ჩარტში ჯამში 20 კვირა გაატარა.
ჯასტინ ტიმბერლეიკს და ჯასტინ ბიბერს დიდი ისტორია აკავშირებთ. ცნობილია, რომ ტიმბერლეიკი ცდილობდა, ჯერ კიდევ უცნობი ბიბერისათვის თავისი ლეიბლით კონტრაქტი გაეფორმებინა, თუმცა კანადელმა თინეიჯერმა ვარსკვლავმა და მისმა მენეჯერმა, სკუტერ ბრაუნმა, საბოლოოდ Usher-თან პარტნიორობა არჩიეს.
