ფილმი „მაიკლი” უკვე რეკორდებს ამყარებს. პოპის მეფეზე გადაღებული ბიოგრაფიული ფილმის პრემიერა კინოთეატრებში 24 აპრილს შედგა და რეკორდული, 97 მილიონი დოლარის საშინაო და 217.4 მილიონი დოლარის საერთაშორისო შემოსავალი მიიღო.
ანტუან ფუკას რეჟისორობით გადაღებული ფილმი მუსიკალურ ბიოგრაფიების ყველაზე მაღალშემოსავლიანი დებიუტი იყო და გადაასწრო ისეთ ნამუშევრებს, როგორებიცაა Straight Outta Compton, რომლის სადებიუტო შემოსავალი 60.1 მილიონ დოლარს შეადგენდა და Bohemian Rhapsody, რომლის დებიუტმა ფილმს 51 მილიონი დოლარი მოუტანა.
910 მილიონი დოლარით Queen-ზე შექმნილი ბიოგრაფიული ფილმი კვლავაც რჩება მსოფლიოს ყველა დროის ყველაზე მაღალშემოსავლიან მუსიკალურ ბიოგრაფიულ ფილმად. ფრედი მერკურის როლის შესრულებისთვის რამი მალეკს საუკეთესო მსახიობი კაცის ნომინაციაში ოსკარი გადაეცა.
„მაიკლი” ამჟამად ასევე ფლობს რეკორდს საშინაო სადებიუტო შემოსავლის მაჩვენებლით ყველა დროის ბიოგრაფიულ ფილმებში და უსწრებს „ოპენჰაიმერს”, რომლის საპრემიერო შემოსავალმაც 80 მილიონი დოლარი შეადგინა.
„ეს რეკორდული მაჩვენებელი ერთგვარი განაცხადია პროდიუსერ გრეჰემ კინგისა და რეჟისორ ანტუან ფუკას შესანიშნავი შემოქმედებითი გუნდის, გასაოცარი სამსახიობო დასის – ჯაფარ ჯექსონის ხელმძღვანელობით, ჩვენი მსოფლიო დონის პარტნიორ Universal-ის, მაიკლ ჯექსონის მემკვიდრეობისა და ჩვენი დაუღალავი Lionsgate-ის გუნდის,” – განაცხადა Lionsgate Motion Picture Group-ის ხელმძღვანელმა ადამ ფოგელსონმა.
ფილმმა აღიარება დაიმსახურა Rotten Tomatoes-ზე, სადაც აუდიტორიისგან 96% მიიღო. ასევე მიიღო A- შეფასება CinemaScore-ზე. The Hollywood Reporter-ის მიხედვით, „მაიკლი” იზიდავს სხვადასხვა დემოგრაფიულ ჯგუფებს, მათ შორის ლიდერობენ შავკანიანი და ქალი მაყურებლები.
ფილმში პოპის მეფის როლს ჯექსონის ძმისშვილი ჯაფარ ჯექსონი ასრულებს. ნამუშევარი ასახავს მაიკლის ცხოვრებასა და კარიერას, The Jackson 5-დან დაწყებული, სოლო კარიერითა და ისტორიული დიდებით დასრულებული. ამბის კულმინაციად კი პოპმუსიკის ისტორიაში ყველაზე გაყიდვადი ალბომის, Thriller-ის გამოცემა გვევლინება.
ნამუშევარი ორნაწილიან ბიოგრაფიულ ფილმადაა დაგეგმილი. „მაიკლი” მის პირველ ნაწილს წარმოადგენს.
