ქართულ მუსიკალურ სცენაზე ახალი სოლო შემსრულებელი დათი ქიმერიძე გამოჩნდა. არტისტმა, ფსევდონიმით INDIEVIDIE, სადებიუტო სინგლი, სახელწოდებით Tell Me More გამოუშვა, რომლის პრემიერა მუსიკალურ ვიდეოსთან ერთად შედგა. დათი ქიმერიძე ალტერნატიული როკბენდის, Process-ის წევრია. რაც შეეხება სოლო პროექტის პრემიერას, მას წინ ხანგრძლივი მოსამზადებელი პერიოდი უძღოდა, რაც საკუთარი ჟღერადობის ძიებასა და ხმის ინჟინერიის შესწავლას მოიცავდა.
არტისტის თქმით, პირველი სინგლის გამოქვეყნება არ ყოფილა სპონტანური გადაწყვეტილება და პროექტის თითოეული ეტაპი წინასწარ იყო დაგეგმილი. INDIEVIDIE-ის მიზანია შექმნას ისეთი პროექტი, რომელიც მსმენელისთვის ახლობელი და სხვადასხვა ემოციური მდგომარეობის თანმდევი გახდება.
„მუდმივად ვცდილობ შევქმნა პროდუქტი, რომელიც იქნება ახალი, ღირებული და დასამახსოვრებელი. რა თქმა უნდა, პირველი რელიზი უცაბედი გადაწყვეტილება არ არის, დიდი ხანი ვგეგმავდი ყველა პოსტს, ყველა ნაბიჯს, ასევე წინასწარ მაქვს გამზადებული კიდევ რამდენიმე სინგლი, რომლებიც შემდგომ Tell Me More-თან ერთად ალბომის სახეს მიიღებს,” – ამბობს არტისტი Billboard Georgia-სთან საუბრისას.
INDIEVIDIE-ის თქმით, შემსრულებლისთვის ალბომის ფორმატი განსაკუთრებული მნიშვნელობის მატარებელია, რადგან ის არა მხოლოდ მელოდია და სინგლების ერთობლიობა, არამედ მსმენელთან კომუნიკაციის, ისტორიის თხრობისა და საერთო განწყობის შექმნის საშუალებაა.
მოუსმინეთ INDIEVIDIE-ის სადებიუტო სინგლს – Tell Me More
