ოლივია როდრიგომ მსმენელებს სიურპრიზი მოუწყო. 26 აპრილს ბრუკლინში, ერთ-ერთ საღამოზე ის მცირე აუდიტორიის წინაშე, ე.წ. „ღია მიკროფონთან“ (open mic) გამოჩნდა და თავისი ახალი სინგლი Drop Dead შეასრულა. „ღია მიკროფონი” არის ღონისძიება, სადაც ნებისმიერ მსურველს შეუძლია სცენაზე გასვლა და სიმღერის შესრულება. ეს ვილიამსბურგში მდებარე Pete’s Candy Store-ში მოხდა, რომელიც დამწყები არტისტების პოპულარიზაციითაა ცნობილი და არა პოპვარსკვლავების პერფორმანსებით.
როდრიგოს აკუსტიკური გამოსვლის კადრები ინტერნეტში მალევე გავრცელდა მას შემდეგ, რაც აუდიტორიამ გააცნობიერა, თუ ვინ იდგა სცენაზე.
მომღერალი ამჟამად ემზადება მესამე სტუდიური ალბომისთვის – You Seem Pretty Sad For A Girl So In Love, რომელიც 12 ივნისს გამოვა. Drop Dead უკვე იქცა ალბომის კამპანიის მნიშვნელოვან ნაწილად, განსაკუთრებით მას შემდეგ, რაც მისი ცოცხალი დებიუტი Coachella-ზე, ედისონ რეის გამოსვლისას შედგა. Pete’s Candy Store-ში სიმღერამ კი სულ სხვა ფორმა მიიღო – ფესტივალის მასშტაბური სცენის გარეშე, როდრიგომ წარმოადგინა გამარტივებული ვერსია, რომლითაც აქცენტი ტრეკის ემოციურ მხარეზე გააკეთა.
დაანონსებული ალბომის კამპანიას თან ახლავს როდრიგოს მოულოდნელი მუსიკალური პერფორმანსები. რამდენიმე დღით ადრე არტისტმა ლოს-ანჯელესში, კლუბ The Echo-ში დახურული კონცერტი გამართა, სადაც მასთან ერთად სცენაზე Weyes Blood გამოჩნდა და რამდენიმე ახალი კომპოზიციაც გაჟღერდა.
აღსანიშნავია, რომ Drop Dead ასევე შეიცავს მინიშნებას ჯგუფ The Cure-ზე და მათ სიმღერაზე Just Like Heaven. ეს კავშირი როდრიგოს 2025 წლის Glastonbury-ს ფესტივალს ეხმიანება, სადაც მან სცენაზე რობერტ სმიტი მიიწვია Friday I’m in Love-ისა და Just Like Heaven-ის ერთობლივად შესასრულებლად.
ოლივია როდრიგოს უნარი, თანაბარი ოსტატობით გამოვიდეს როგორც გიგანტურ ფესტივალებზე, ისე მცირე დარბაზებში, მისი წარმატების ერთ-ერთი მთავარი ფაქტორია. ალბომი GUTS, რომელიც როდრიგომ 2023 წელს გამოსცა, Billboard 200-ის პირველ ადგილზე მოხვდა, Billboard Hot 100-ის საუკეთესო ათეულში კი შევიდნენ სინგლები vampire და bad idea right?.
