Lady Gaga ოფიციალურად ასრულებს Mayhem-ის ერას ახალი ფილმით, სადაც არტისტის გრემის მფლობელი ალბომის, Mayhem-ის სიმღერების ახალი ვერსიებიც არის შესული. აღსანიშნავია, რომ პროექტი იანვარში, ლოს-ანჯელესში გამართული კონცერტის დროს არის გადაღებული.
Apple Music-თან თანამშრომლობით შექმნილი ფილმის, Lady Gaga MAYHEM Requiem-ის პრემიერა Apple Music-ზე 14 მაისს შედგება. ფილმის ნახვა კი პრემიერის დროს გამოწერის გარეშეც იქნება შესაძლებელი.
მოგვიანებით Lady Gaga-ს სრული საკონცერტო ჩანაწერი და ცოცხლად შესრულებული სიმღერების ალბომი Apple Music-ის გამომწერებისთვის ნებისმიერ დროს იქნება ხელმისაწვდომი.
სტრიმინგ-პრემიერის პარალელურად, ფილმის ჩვენება იმავე დღეს აშშ-ის მასშტაბით AMC Theatres-ის 15 კინოთეატრშიც გაიმართება.
MAYHEM Requiem მიმდინარე წლის 14 იანვარს, ლოს-ანჯელესში, 1850 ადამიანზე გათვლილ სივრცეში – Wiltern Theatre-ში გადაიღეს. შოუს კონცეფცია განსაკუთრებით შთამბეჭდავია: სპექტაკლის გადასაღებ მოედანზე Lady Gaga-მ Mayhem Ball-ის ტურნესთვის აშენებული ცნობილი ოპერის თეატრი ნანგრევებად აქცია, თავად კი მაყურებლის წინაშე „ოპერის ფანტომის“ მსგავსი პერსონაჟის სახით წარდგა.
ფილმში წარმოდგენილია ისეთი ჰიტების ახალი ინტერპრეტაციები, როგორებიცაა Abracadabra, Disease და Die With a Smile. ფილმის პროდიუსერია Morningview.
Lady Gaga-მ მსოფლიო ტურნეს, Mayhem Ball Tour-ის ბოლო კონცერტები აპრილში New York City-ში გამართა და ამით ხუთ კონტინენტზე მიმდინარე ერთწლიანი ტურნე დაასრულა.
როგორც Billboard აპრილში წერდა, Mayhem-ის ტურნეს საერთო შემოსავალმა 419.5 მილიონი დოლარი შეადგინა და Billboard Boxscore-ის მონაცემებით, ტურნეს ფარგლებში თითქმის ორი მილიონი ბილეთი გაიყიდა.
ეს შედეგი Lady Gaga-ს კარიერაში ყველაზე შემოსავლიან ტურნედ ითვლება, ამასთან, იგი ყველა დროის 10 ყველაზე შემოსავლიან პოპ-ტურნეს შორის დასახელდა.
ნახეთ Lady Gaga MAYHEM Requiem-ის ფილმის ტრეილერი:
