Spotify-მ 15 მაისს განაცხადა, რომ Drake-მა 2026 წელს პლატფორმაზე ერთ დღეში ყველაზე მეტად მოსმენადი შემსრულებლის, ალბომისა და სიმღერის რეკორდები მოხსნა. ეს არტისტის პირველი სოლო პროექტია 2023 წლის შემდეგ.
2026 წლის განმავლობაში ერთ დღეში ყველაზე მეტად მოსმენადი ალბომის ტიტული Iceman-ს ერგო. ეს არის ერთ-ერთი იმ სამი ალბომიდან, რომელიც რეპერმა პარასკევს დილით გამოუშვა, მათ შორის მოულოდნელი რელიზებიც: Maid of Honour და Habibti. სიმღერების კატეგორიაში კი ერთდღიანი რეკორდი ეკუთვნის სინგლს – Make Them Cry, რომელიც Iceman-ის პირველი კომპოზიციაა.
„15 მაისს Drake Spotify-ზე ერთ დღეში 2026 წლის ყველაზე მეტად მოსმენად შემსრულებლად იქცა, ICEMAN – ერთ დღეში წლის ყველაზე მეტად მოსმენად ალბომად, ხოლო ამ დროისთვის Make Them Cry, ერთი დღის განმავლობაში, 2026 წლის ყველაზე მეტად მოსმენად სიმღერად ითვლება”, – განაცხადა Spotify-მ სოციალურ ქსელებში.
აღსანიშნავია, რომ სამი ალბომის ეს სერია Drake-ის პირველი სოლო პროექტია 2023 წლის For All the Dogs-ის შემდეგ. გასულ წელს კი მან კოლაბორაციული ალბომი Some Sexy Songs 4 U გამოსცა თანამემამულე კანადელ მუსიკოსთან, PARTYNEXTDOOR-თან ერთად.
ალბომ Iceman-ის გამოსვლამდე, პლატფორმაზე 2026 წელს ერთ დღეში ყველაზე მეტად მოსმენილი ალბომის რეკორდს სამხრეთკორეული ბენდის, BTS-ის ალბომი ARIRANG ფლობდა, რომელიც მარტში გამოიცა. საინტერესო ფაქტია ისიც, რომ Drake BTS-ის ბენდს ახალ პროექტშიც ახსენებს, კერძოდ Spotify-ს რეკორდსმენ სიმღერაში Make Them Cry.
პარასკევს BTS-ის წევრის, V-ის მიერ ინსტაგრამ სთორში გავრცელებულ ვიდეოში ჩანს, თუ როგორ უსმენენ ის და J-Hope ამ სიმღერას და ერთად ცეკვავენ. სწორედ იმ მომენტში, როდესაც Drake მათზე რეპავს (I’m feeling like BTS, ’cause it took the whole career for me to be so discovered) – ორივე არტისტი გაკვირვებული ერთდროულად იყურება კამერისკენ.
