15 მაისს ალექსანდრე კორძაიამ (Kordz) და მაქსიმე მაჩაიძემ (Luna997) ახალი კოლაბორაციული ტრეკი, სახელწოდებით „ნამცხვარი ცხვება” წარადგინეს. ნამუშევრის მოსმენა მუსიკალურ სტრიმინგ პლატფორმებზე უკვე შესაძლებელია.
ალექსანდრე კორძაია, სასცენო სახელით Kordz, თანამედროვე მუსიკალური სცენის გამორჩეული პროდიუსერი, კომპოზიტორი და შემსრულებელია. მისი ხელწერა კლასიკური, ორკესტრული და ელექტრონული ელემენტების სინთეზსა და ექსპერიმენტულ ჟღერადობასთან ასოცირდება. Kordz-ის შემოქმედება მრავალი საინტერესო კოლაბორაციით გამოირჩევა. მას არაერთხელ უთანამშრომლია ისეთ მუსიკოსებთან, როგორებიც არიან ნიკოლოზ რაჭველი, ნატალია ბერიძე და რეპერი DRO. აღსანიშნავია მისი კოლაბორაცია პროექტ Kayakata-სთანაც, რომლის წევრიც მაქსიმე მაჩაიძე იყო.
Luna997-ს (მაქსიმე მაჩაიძე) ქართველი მსმენელი სხვადასხვა მუსიკალური პროექტიდან უკვე კარგად იცნობს. მისი, როგორც არტისტის პერსონა მრავალმხრივია და მუსიკასთან ერთად, ვიზუალური ხელოვნების სხვადასხვა მიმართულებას აერთიანებს.
