Charli xcx ახალი ალბომის, Music, Fashion, Film-ის გამოცემის თარიღს ასახელებს. ალბომი 24 ივლისს გამოვა და მასში შევა მუსიკოსის ბოლო ორი სინგლი: Rock Music და SS26.
აღსანიშნავია პროექტის ყდა, რომელზეც ცოცხალი ლეგენდები არიან გამოსახული. ყდა მოიცავს შავ-თეთრ ფოტოს, რომელზეც ალბომის სათაურში გაერთიანებული სამი სფეროს – მუსიკა, მოდა, ფილმი – პიონერები არიან გამოსახული: The Velvet Underground-ის ჯონ კეილი, დიზაინერი მარკ ჯეიკობსი და კინორეჟისორი მარტინ სკორსეზე. ყდის ავტორი აიდან ზამირია.
ჩარლიმ ახლახან ითანამშრომლა ჯონ კეილთან სიმღერაზე House, „ქარიშხლიანი უღელტეხილის” საუნდტრეკის ალბომიდან, რომელიც 2026 წლის თებერვალში გამოვიდა. ბოლო წლებში მომღერალი ასევე იყო მარკ ჯეიკობსის მოდელი და ჩნდებოდა დიზაინერის ტანისამოსის ხაზის კამპანიაში.
ალბომის გამოსვლის ამბავი ჩარლიმ ინსტაგრამზე დაადასტურა და დაწერა, რომ ჩანაწერი 11 სიმღერისგან შედგება და მისი ქრონომეტრაჟი 30 წუთი და 5 წამია.
პროექტის სახელწოდება SS26-დან მოდის, სადაც ბრიტანელი არტისტი მღერის: „ჩვენ გამოვდივართ პოდიუმზე, რომელიც პირდაპირ ჯოჯოხეთში მიდის; არაფერი დაგვიცავს – არც მუსიკა, არც მოდა და არც კინო.”
Music, Fashion, Film ჩარლის პირველი ალბომია 2014 წლის brat-ის შემდეგ, რომელმაც პოპვარსკვლავი საკულტო მეინსტრიმ არტისტად აქცია. ალბომმა დიდი ბრიტანეთის ჩარტში პირველი, Billboard 200-ში კი მე-3 პოზიცია დაიკავა.
ბრიტანულ „ვოგთან” საუბრისას, მომღერალმა აღნიშნა, რომ ახალი ალბომის განსხვავებულმა მიმართულებამ შესაძლოა მსმენელის აზრი ორად გაყოს. „ჩემთვის სახალისოა ფორმების შეცვლა,” – თქვა მან. „თუმცა ვიცით, რომ არსებობენ ადამიანები, რომლებსაც ეს აღიზიანებთ, მაგრამ ეს სრულიად ნორმალურია.”
ალბომის გამოცემის შემდეგ, 31 ივლისს ჩარლი ლოლაპალუზას ფესტივალის ჰედლაინერი იქნება, 28-29 აგვისტოს კი დიდი ბრიტანეთის Reading & Leeds ფესტივალზე წარდგება.
