სერიალი Euphoria მესამე სეზონის ფინალური სერიით 31 მაისს დასრულდა. HBO-ს სერიალის შემქმნელი სემ ლევინსონი The New York Times-ის პოდკასტს – Popcast-ს ეწვია. მან შოუს ფინალზე ისაუბრა და ასევე შეეხო დრეიკის, როგორც აღმასრულებელი პროდიუსერის როლს.
ლევინსონმა დრეიკს მადლობა გადაუხადა იმის გამო, რომ ის შოუს ერთ-ერთი პირველი გულშემატკივარი იყო. მისივე თქმით, დრეიკის მხარდაჭერამ ძალიან დიდი როლი ითამაშა ჯერ კიდევ იქამდე, სანამ 2019 წელს პირველი სეზონი ეთერში გავიდოდა.
„დრეიკი სცენარს ძალიან ადრეულ ეტაპზე გაეცნო. ეს ის პერიოდია, როდესაც HBO ჯერ კიდევ არ იყო დარწმუნებული შოუს წარმატებაში. მან თქვა: მინდა პროდიუსერად შემოვუერთდე გუნდს, მინდა ვიყო აღმასრულებელი პროდიუსერი. მან HBO-ს თავდაჯერებულობა შემატა და ამისთვის ყოველთვის მადლობელი ვიქნები,” – გაიხსენა სემ ლევინსონმა, რომელიც Euphoria-ს შემქმნელი, რეჟისორი, სცენარისტი და პროდიუსერია. მან განმარტა, რომ დრეიკის, როგორც აღმასრულებელი პროდიუსერის როლი უფრო მეტად შოუს პოპულარიზაციასა და მარკეტინგში გამოიხატებოდა, ვიდრე სცენართან დაკავშირებული რჩევების მიცემაში.
„ყოველთვის გჭირდება ისეთი ადამიანები, რომლებიც სხვებსაც თავდაჯერებულობას მატებენ. დრეიკი სწორედ ასეთი მხარდამჭერი აღმოჩნდა,” – აღნიშნა ლევინსონმა.
დრეიკის სერიალის აღმასრულებელ პროდიუსერად დანიშვნა ჯერ კიდევ 2018 წელს გამოცხადდა. სცენარმა მასზე დიდი შთაბეჭდილება მოახდინა, რაც გასაკვირი არ არის – არტისტმა კარიერა სწორედ მსახიობობით დაიწყო. ის მონაწილეობდა სერიალში, სახელწოდებით Degrassi და ასევე იყო Netflix-ის სერიალის, Top Boy-ს 2019 წლის ვერსიის აღმასრულებელი პროდიუსერი.
სემ ლევინსონმა ასევე დაადასტურა, რომ 7 წლის შემდეგ, Euphoria მესამე სეზონის 90-წუთიანი ფინალური სერიით საბოლოოდ დასრულდა. მოგვიანებით Variety-სთან საუბარში HBO-ს წარმომადგენელმაც განაცხადა, რომ შოუ დასრულებულია.
Euphoria რეპის სამყაროსთან 2024 წელსაც გადაიკვეთა, როდესაც კენდრიკ ლამარისა და დრეიკის დაპირისპირების ეპიცენტრში აღმოჩნდა. კენდრიკმა დრეიკისადმი მიძღვნილ ერთ-ერთ ტრეკს სახელი სწორედ შოუს მიხედვით დაარქვა.
ამჟამად დრეიკი ყურადღების ცენტრშია თავისი ახალი ალბომით ICEMAN, რომელიც უკვე მეორე კვირაა, Billboard 200-ის სათავეშია. 28 მაისით დათარიღებულ კვირაში, შეერთებული შტატების მასშტაბით, ალბომის 225 000 ეკვივალენტური ერთეული გაიყიდა.
ნახეთ სემ ლევინსონის ინტერვიუ:
