1 ივნისს პოპ-სუპერვარსკვლავმა ოფიციალურად დაადასტურა, რომ ამ პარასკევს ახალ სინგლს I Knew It, I Knew You გამოუშვებს, რომელიც საკულტო ანიმაციის, Toy Story 5-ის საუნდტრეკი იქნება.
ოფიციალური განცხადების მიხედვით, ნამუშევარი ტეილორ სვიფტის ქანთრის ფესვებთან დაბრუნებას აღნიშნავს და კოვბოი გოგონა ჯესის ისტორიითა და თავგადასავლებით არის შთაგონებული, რომელიც პირველად მაყურებელმა Toy Story 2-ში გაიცნო.
Billboard-ის Pop Shop Podcast-ის ახალ ეპიზოდში ქეითი და კიტი ყველა იმ დეტალს განიხილავენ, რაც ამ დროისთვის ახალი სიმღერის შესახებ არის ცნობილი. წამყვანები ასევე საუბრობენ ტეილორ სვიფტის კინომუსიკაში დაბრუნებაზეც. ცნობისთვის, მას „საუკეთესო ორიგინალური სიმღერის“ ნომინაციაში „ოქროს გლობუსის“ ოთხი ნომინაცია აქვს მოპოვებული.
გარდა ამისა, გადაცემაში საუბრობენ Drake-ზე, რომელიც ალბომ ICEMAN-ით Billboard 200-ის ალბომების ჩარტში უკვე მეორე კვირაა, ლიდერ პოზიციაზეა, ხოლო მისი სინგლი Janice STFU ასევე მეორე კვირაა, Billboard Hot 100-ში პირველ ადგილზეა. აღსანიშნავია, რომ Drake-ის თხუთმეტი პირველადგილოსანი ალბომიდან ICEMAN რიგით მეექვსეა, რომელმაც ჩარტის სათავეში ერთ კვირაზე მეტი დაჰყო, ხოლო სიმღერა Janice STFU მისი პირველი ტრეკია 2018 წლის შემდეგ, რომელიც ჩარტის სათავეში რამდენიმე კვირით დარჩა.
Billboard Pop Shop Podcast – ეს არის სივრცე, სადაც პოპ-მუსიკის სამყაროს ყველა მნიშვნელოვანი სიახლე იყრის თავს. აქ შეგიძლიათ მოისმინოთ ჩარტების ანალიზი, საინტერესო სტატისტიკა, ახალი რელიზები და ინტერვიუები პოპ-არტისტებთან. პოდკასტს ყოველკვირეულად Billboard-ის ციფრული დირექტორი ქეით ატკინსონი და Billboard-ის ჩარტებისა და მონაცემთა ოპერაციების მმართველი დირექტორი კით კოლფილდი უძღვებიან.
პოდკასტის მოსმენა შესაძლებელია Billboard-ის ოფიციალურ ვებგვერდზე, ასევე Apple Podcasts-სა და სხვა პლატფორმებზე.
