დუა ლიპამ და კალუმ ტერნერმა დაქორწინება მეორედ აღნიშნეს. გავრცელებული ინფორმაციით, ბრიტანელმა პოპვარსკვლავმა და მსახიობმა საქორწინო ფიცი ამჯერად პალერმოში, სიცილიაში დადეს.
ვარსკვლავებით დატვირთული ღონისძიება მე-18 საუკუნის ვილაში შედგა და 300-მდე სტუმარს მასპინძლობდა. ახლადდაქორწინებულებს უმღერა ელტონ ჯონმა, რომელმაც ფორტეპიანოს თანხლებით მათთვის Your Song შეასრულა.
2021 წელს ლიპასა და ელტონ ჯონს გამოშვებული აქვთ სიმღერა Cold Heart, რომლის რემიქსმა (PNAU-ს შესრულებით) Billboard Hot 100-ის მე-7 პოზიცია დაიკავა.
წყვილის სიცილიურ წვეულებას სტუმრების შთამბეჭდავი შემადგენლობა ჰყავდა, რომელთა შორისაც იყვნენ: დონატელა ვერსაჩე, ოლივია დინი, Charli XCX, Tame Impala-ს სოლისტი კევინ პარკერი, მარკ რონსონი და სხვები. ღონისძიების მუსიკალურ გაფორმებაზე ზრუნავდნენ: კარლ კოქსი, მარტინ გარიქსი, დევიდ გეტა და პეგი გოუ.
წვეულებამდე რამდენიმე დღით ადრე, 31 მაისს, ლიპამ და ტერნერმა ოფიციალურად ლონდონში, ვიწრო წრეში იქრორწინეს. ცერემონიის შემდეგ გავრცელებულ ფოტოებში ლიპა სკიაპარელის პიჯაკსა და ქვედაბოლოშია გამოწყობილი და თეთრი ქუდი ახურავს. „21.05.2026” – წერს პოსტის აღწერაში მომღერალი.
ლიპამ ტერნერთან ნიშნობა 2025 წლის ივნისში დაადასტურა. წყვილის რომანის შესახებ ჭორები 2024 წლის იანვრიდან ვრცელდებოდა – მას შემდეგ, რაც ისინი ერთად შენიშნეს Masters of the Air-ის პრემიერის შემდგომ წვეულებაზე.
2025 წლის დეკემბერში ლიპამ Radical Optimism-ის ტურნე დაასრულა, რომელიც წელიწადზე მეტხანს გაგრძელდა. გასულ თვეში კი მომღერალმა ალბომი Live From Mexico გამოსცა, რომელიც მოიცავს ცოცხალ შესრულებებს მეხიკოში გამართული სამი კონცერტიდან.
