2027 წლის 11 იანვარს ლუცერნის კულტურისა და კონგრესების ცენტრში პიანისტთა საერთაშორისო ფესტივალი – Le Piano Symphonique ჩატარდება. ფესტივალს საზეიმოდ გახსნის ერთ-ერთი ყველაზე გავლენიანი და ლეგენდარული თანამედროვე პიანისტი მარტა არგერიხი.
გახსნის საღამოზე მარტა არგერიხთან ერთად გიორგი გიგაშვილიც წარდგება.
„მოკლედ! დიდად არც მჯერა ამას რომ ვწერ. 11 იანვარს ლუცერნში ჩემი ოცნება ხდება! კონცერტი მარტას და ჩემი მონაწილეობით,” – წერს გიორგი გიგაშვილი სოციალურ ქსელში.
კონცერტზე მარტა არგერიხს აკომპანირებას გაუწევს ლუცერნის სიმფონიური ორკესტრი, რომელსაც პირველი კონცერტმაისტერი გრეგორი ასი უხელმძღვანელებს. გიორგი გიგაშვილთან ერთად სცენაზე ახალგაზრდა პიანისტი ტიანიაო ლიუც წარდგება.
გახსნის საღამოს პროგრამა მთლიანად რობერტ შუმანის შემოქმედებას ეთმობა. საღამოზე შესრულდება კომპოზიტორის საკონცერტო რეპერტუარის სამი ცნობილი ნაწარმოები: საკონცერტო პიესა ფორტეპიანოსა და ორკესტრისთვის სოლ მაჟორში, თხზ. 92, საკონცერტო ალეგრო ფორტეპიანოსა და ორკესტრისთვის რე მინორში, თხზ. 134 და კონცერტი ფორტეპიანოსა და ორკესტრისთვის ლა მინორში, თხზ. 54.
აღსანიშნავია, რომ მარტა არგერიხი 2020 წელს ქართველი მსმენელის წინაშე წინანდლის ფესტივალზე წარდგა.
