ქართველი არტისტი Saphileaum (ანდრო გოგიბედაშვილი) ახალ ალბომს წარადგენს. პროექტის სახელწოდებაა Heavenly Hills და ის ავსტრალიურმა ლეიბლმა, Good Morning Tapes-მა ფირფიტაზე გამოსცა.
Heavenly Hills არის New Age და Trip Hop ელემენტებით ინსპირირებული ალბომი.
როგორც არტისტი Billboard Georgia-სთან საუბრისას ამბობს, ალბომში შემავალი ტრეკები ჰიმალაებში მდებარე შამბალას მისტიური სამეფოს შთაგონებით დაიწერა.
Saphileaum:
„მუსიკის წერისას, გონებაში ყოველთვის ამ ადგილის სურათი მქონდა, მასზე ბევრს ვკითხულობდი და ვიკვლევდი. ეს ალბომი ერთგვარი თამაში და ცეკვაა მის ენერგიასთან და ჩემს სამყაროში მის არსებობასთან. Alarko (კოსმოსური არწივი) ეძღვნება ბაბუაჩემს – თემურ წიკლაურს, მთელი ალბომი კი ეძღვნება საქართველოს“.
ალბომში შესულია 5 კომპოზიცია. მასტერინგი კრიკორ კოუჩიანს ეკუთვნის, რომელიც პარიზში დაფუძნებული არტისტია. ნამუშევრის დისტრიბუციაზე ინგლისური კომპანია Boomkat ზრუნავს.
უახლოეს მომავალში Saphileaum კალიფორნიაში კიდევ ერთი ალბომის გამოცემას გეგმავს, წლის ბოლომდე კი მორიგ ნამუშევარს კასეტაზე გამოუშვებს.
„ასევე, წელს თემურ წიკლაურის 80 წლის იუბილეა და ამასთან დაკავშირებით ვგეგმავთ, ექსკლუზიური ფირფიტა და კომპაქტ-დისკები გამოვუშვათ. ამის შესახებ ინფორმაციას უახლოეს მომავალში დეტალურად გაგიზიარებთ.”– Saphileaum.
