27 და 28 ივნისს მთაწმინდის პარკში, Underwheel Terrace-ზე პირველი მასშტაბური ქართული ურბანული ფესტივალი – Flow Flow Fest გაიმართება. პროექტი თანამედროვე მუსიკალურ და ურბანულ კულტურას, რეპ ბეთლებსა და სპორტულ აქტივობებს აერთიანებს. ფესტივალის მიზანი საქართველოში ურბანული ჟანრის პოპულარიზაცია და ადგილობრივი არტისტებისთვის დიდი სცენის დათმობაა.
Flow Flow Fest-ის ფარგლებში ასევე შედგება PVP FLOW B2B-ის სეზონის მასშტაბური და ყველაზე მნიშვნელოვანი ფინალი.
ორდღიანი ფესტივალის ჰედლაინერები არიან: TAHA, BXNNY, MOSKA, KAMI, MADMOSE, IVA G, MVYKL, TOVLY, EREKLE DEISADZE, SKAZZ.
ორგანიზატორები Flow Flow Fest-ს წარადგენენ, როგორც პლატფორმას, რომელიც აუდიტორიას გააცნობს ადგილობრივ მუსიკალურ ინდუსტრიას, ე.წ. რეპ ბეთლების კულტურასა და ახალგაზრდულ სუბკულტურას. ორგანიზატორების თქმით, ეს არის სივრცე, სადაც ნებისმიერ მსმენელს შეუძლია გახდეს უშუალო მონაწილე.
“ფესტივალის იდეა ქართულ ჰიპ-ჰოპ სივრცეში დიდი ხანია, არსებობდა. სხვადასხვა დროს მცდელობებიც იყო, თუმცა მსგავსი მასშტაბის პროექტი ყოველთვის დიდ რისკთან და პასუხისმგებლობასთან არის დაკავშირებული. მიზეზი, თუ რატომ გადავწყვიტეთ სწორედ ჩვენ ამ იდეის რეალობად ქცევა, მარტივია: FlowFlow-ს საქმიანობა თავიდანვე ქართული ჰიპ-ჰოპის განვითარებასა და პოპულარიზაციაზე იყო ორიენტირებული. ჩვენ გვჯერა, რომ ამ ჟანრს და მის წარმომადგენლებს დიდი სცენა ეკუთვნით.
ქართველი არტისტები ყოველდღიურად მუშაობენ, ქმნიან ახალ მუსიკას, რითაც ინდუსტრიას ავითარებენ. ეს ფესტივალი მათი შრომის ერთგვარი დაფასებაა. თუმცა, ამავდროულად, ის ბევრად მეტია, ვიდრე უბრალოდ მუსიკალური ღონისძიება. ეს არის სივრცე, სადაც საერთო ინტერესების მატარებელი მსმენელები ერთმანეთს ხვდებიან და ერთიანდებიან, ხოლო არტისტები იღებენ დამატებით მოტივაციას, იყვნენ უფრო აქტიურები და შექმნან ახალი შესაძლებლობები. ჩვენ ვფიქრობთ, რომ ჰიპ-ჰოპი მუდმივი მოძრაობაა,” – ამბობენ Billboard Georgia-სთან საუბრისას Flow Flow Fest-ის ორგანიზატორები.
ფესტივალზე დასასწრები ბილეთების შესაძენად ეწვიეთ ბმულს.
