ივნისის თვეში ქართულ მუსიკალურ სივრცეში ახალი პროექტი გამოჩნდა, საინტერესო სახელწოდებით „ისინი”. პროექტის უკან ორი ადამიანი დგას – ზვიად მღებრი და მისი მეუღლე ია ჰონტასი. მათი მუსიკა თანამედროვე ელექტრონული ჟღერადობისა და 70-იანი წლების ატმოსფეროს აერთიანებს. მსმენელი მასში შეხვდება დისკოს, დრიმ პოპს, ინდი პოპს, თუმცა თავად საკუთარ შემოქმედებას ერთი სიტყვის გარშემო ხედავენ – ნოსტალგია.
ზვიადი: ჩვენ გვაინტერესებს ნოსტალგია – არა როგორც წარსულში დაბრუნების სურვილი, არამედ როგორც განცდა. გვიყვარს ისეთი მუსიკის შექმნა, რომელიც თითქოს ნაცნობია, მაგრამ სინამდვილეში პირველად გესმის. თითქოს საუნდტრეკია ძველი ფილმის, რომელიც არასდროს გადაუღიათ. ალბათ ჩვენი პროექტიც ამ შეგრძნების გარშემო გაერთიანდა. თუ ერთი სიტყვით აღვწერთ „ისინის” მუსიკას, ეს იქნება სინემატიკური ნოსტალგია.
თავად ზვიადი ფილმისა და ვიზუალური მედიის კომპოზიტორია და ახალი ბენდის იდეაც ერთგვარად მის პროფესიას ეხმაურება. ის ხმის დიზაინის ქართულ კომპანია POSTRED-ში მუშაობს, რომელმაც სახელი გაითქვა ისეთ საერთაშორისო პროექტებზე მუშაობით, როგორებიცაა HBO-ს სერიალები Euphoria და The Idol, „ნეტფლიქსის” პროექტები და სხვა.
2011 წელს ზვიადმა ალტერნატიული როკბენდი The Mins დააარსა. იასთან ერთად მას ასევე ჰქონდა ბენდი Shraves. საშემსრულებლო პაუზის შემდეგ კი ისინი მსმენელის წინაშე ახალი კონცეფციით დაბრუნდნენ.
ზვიადი: იდეა ნელ-ნელა ჩამოყალიბდა. იას ყოველთვის იზიდავდა ვიზუალური ამბების თხრობა და წერა. მივხვდით, რომ გვინდოდა ისევ შეგვექმნა რაღაც, რაც მთლიანად ჩვენი იქნებოდა – ადგილი, სადაც არანაირი ჩარჩო არ იარსებებდა და სრულიად ავთენტური იქნებოდა. ასე დაიბადა „ისინი”.
ია: თავიდანვე ისეთი სახელწოდება გვინდოდა, რომელიც პასუხებს კი არ გასცემდა, არამედ კითხვებს გააჩენდა. „ისინი” ქართულში ძალიან საინტერესო სიტყვაა – ვიღაცებზე საუბრობ, მაგრამ არ აკონკრეტებ. შეიძლება გულისხმობდე ადამიანებს, მოგონებებს, ემოციებს ან თუნდაც ჩვენს სხვადასხვა ვერსიას. ჩვენი გაცნობიდან მალევე, როცა ჩვენი ძველი პროექტი შეიქმნა, გამოვეცით პირველი სიმღერა „ისინი დარბიან” და აქედან წამოვიდა ახლანდელი ბენდის სახელწოდებაც.
ზვიადი: ლოგოტიპშიც ძალიან ლამაზად ჩაჯდა, როგორც სამი ყვავილი – „არ დამივიწყო”, იგივე კესანე. და ზოგადად, მოგვწონს, რომ თითოეულ მსმენელს შეუძლია, ამ სიტყვაში თავისი მნიშვნელობა იპოვოს.
კომპოზიციები და პროდიუსინგი ზვიადს ეკუთვნის, ტექსტები – იას, თუმცა მუშაობის პროცესი ყოველთვის ერთობლივად მიმდინარეობს. განსაკუთრებულია სამუშაო გარემოც – სოფლის სახლი, ბუნება, სიმშვიდე და მუსიკა.
ზვიადი: ზოგადად, „ისინის” ისტორიაც სოფელს უკავშირდება. იმ პერიოდში აქ სახლი შევიძინეთ და ხშირად დავდიოდით. მაშინ ბენდზე არც ვფიქრობდით, უბრალოდ სიმღერის წერა დავიწყეთ და ნელ-ნელა ვავითარებდით მას ლამაზი ბუნების ფონზე. ასე შეიქმნა ჩვენი პირველი სიმღერა „ესეც გაივლის”, რომელზე მუშაობაც რეალურად 2-3 წლის წინ დავიწყეთ. მერე უკვე სხვა სიმღერების იდეებიც მოგვდიოდა და მივხვდით, რომ გვინდოდა, შეგვექმნა მუსიკალური დუეტი.
ია: სიმღერის შექმნის ყველაზე საინტერესო ნაწილი ძიების პროცესია. საბოლოო შედეგი მხოლოდ მცირე ნაწილია იმ დიდი გზისა, რომელსაც თითოეული ნამუშევარი გადის, სანამ მსმენელამდე მივა. ჩვენ ძალიან პერფექციონისტული მიდგომა გვაქვს, რის გამოც საკმაოდ დიდი დრო გვჭირდება, რომ კომპოზიციას დასრულებული დავარქვათ.
ამჟამად ბენდი პირველ ვიდეოკლიპზე მუშაობს, რომელიც ივლისის ბოლოს გამოვა. მანამდე კი გულშემატკივარს სოციალურ ქსელებში მის ფრაგმენტებს უზიარებენ. აგვისტოში კი „ისინი” რიგით მეორე სიმღერას გამოსცემენ.
ზვიადი: ჩვენი მთავარი მიზანი არ არის უბრალოდ ბევრი სიმღერის გამოშვება. გვინდა, ადამიანებს შეეძლოთ, „ისინის” სამყაროში დაბრუნება ყოველ ჯერზე, როცა ჩვენს მუსიკას მოუსმენენ და ჩვენს ისტორიებსა და მელოდიებში თავიანთი ნაწილი იპოვონ. გვსურს, რომ ჩვენი სიმღერები მათი გახდეს და მათი ცხოვრების სხვადასხვა ეპიზოდს სასიამოვნოდ დაუკავშირდეს. თუ ადამიანებს ჩვენი მუსიკით ემოციებს განვაცდევინებთ, ჩავთვლით, რომ მიზანს მივაღწიეთ.
