თბილისში, კუს ტბაზე, Red Bull Dance Your Style-ის საქართველოს ეროვნული ფინალი გაიმართა, სადაც ქუჩის ცეკვის 16 საუკეთესო მოცეკვავე გამარჯვებისთვის ერთმანეთს დაუპირისპირდა. საერთაშორისო ფორმატის ერთ-ერთი მთავარი თავისებურების შესაბამისად, გამარჯვებული არა ჟიურიმ, არამედ მაყურებლის ხმებმა გამოავლინა.
დაძაბული და სანახაობრივი „ბეთლების“ შემდეგ NAE NAE-მ ფინალში Lucas-სთან გამარჯვება მოიპოვა, შედეგად NAE NAE სწორედ ის მოცეკვავე გახდა, რომელიც საქართველოს სახელით Red Bull Dance Your Style-ის მსოფლიო ფინალზე იასპარეზებს. საერთაშორისო შეჯიბრება 24 ოქტომბერს შვეიცარიის ქალაქ ციურიხში გაიმართება.
ფოტო: ნინუცა კაკაბაძე
აღსანიშნავია, რომ Red Bull Dance Your Style-ის ფორმატი სრულად იმპროვიზაციაზეა დაფუძნებული. მონაწილეები წინასწარ არ იცნობენ მუსიკალურ კომპოზიციებს, რომლებზეც მოუწევთ ცეკვა, ხოლო თითოეული დაპირისპირების გამარჯვებულს დარბაზში შეკრებილი მაყურებელი LED სამაჯურების მეშვეობით ავლენს.
ფოტო: ნინუცა კაკაბაძე
წლევანდელ ფინალში 16 მოცეკვავე ერთმანეთს ერთი-ერთზე „ბეთლებში“ შეხვდა. ღონისძიების მუსიკალური ნაწილი ქართველი და უცხოელი შემსრულებლების პოპულარული ტრეკებით იყო დატვირთული, DJ-ის პულტიდან გაჟღერდა ისეთი პოპულარული ჰიტები, როგორებიცაა KayaKata-ს Polo Palace და 666uba & Mamaflex-ის Kobra, ხოლო საღამოს სპეციალური სტუმარი Mamaflex იყო, რომელმაც მსმენელის წინაშე Hear Me Tonight შეასრულა.
ფოტო: ნინუცა კაკაბაძე
ფინალისტები წინასწარი შესარჩევი ეტაპის შედეგად გამოვლინდნენ. მონაწილეები იაპონელმა მოცეკვავემ, Red Bull-ის არტისტმა და საერთაშორისო ჩემპიონატის Juste Debout-ის გამარჯვებულმა Kyoka-მ შეაფასა. შერჩევა ოთხი კრიტერიუმით ხდებოდა: მოძრაობით, რითმით, კრეატიულობითა და ქარიზმით.
გამარჯვების შემდეგ NAE NAE-მ აღნიშნა, რომ Red Bull Dance Your Style-ში მონაწილეობა მისთვის უკვე მესამე მცდელობა იყო, ხოლო გამარჯვება მაყურებლის მხარდაჭერამ და საკუთარი თავის რწმენამ განაპირობა.
ფოტო: ნინუცა კაკაბაძე
„მე ვარ NAE NAE ქალაქ რუსთავიდან, სტუდია „მოზაიკის“ წარმომადგენელი. ეს ჩემთვის უკვე მესამე Red Bull Dance Your Style იყო და ძალიან ბედნიერი ვარ, რომ ჩემმა ვაიბმა და სტილმა მაყურებლის გული მოიგო. პირველ რიგში მინდა მადლობა გადავუხადო აუდიტორიას, მათი მხარდაჭერის გარეშე ეს გამარჯვება ვერ შედგებოდა. ახლა საქართველოს სახელით მსოფლიო ფინალზე, ციურიხში მივემგზავრები და ეს ჩემთვის უდიდესი ბედნიერებაა. თავიდანვე მჯეროდა, რომ ფინალამდე მივიდოდი. სცენაზე ასვლისას საკუთარი თავის უნდა გჯეროდეს, შენს ამ ენერგიას მაყურებელიც გრძნობს. ჩემთვის თავდაჯერებულობა ყველაზე მნიშვნელოვანი იყო და ვფიქრობ, ეს მუხტი მაყურებელსაც გადაეცა. მინდა ცალკე აღვნიშნო ჩემი მენტორების მხარდაჭერა: ჩემი მეუღლის, რომელიც ჩემი მენტორიცაა, ნინოს, და ჩემი საუკეთესო მეგობრის, რამინის. სწორედ მათი დიდი წვლილის შედეგად ვარ დღეს ის, ვინც ვარ.”
NAE NAE მსოფლიო ფინალზე 30-ზე მეტი ქვეყნის გამარჯვებულთან ერთად იასპარეზებს და საქართველოს სახელით Red Bull Dance Your Style-ის მსოფლიო ჩემპიონის ტიტულისთვის იბრძოლებს.
ფოტო: ნინუცა კაკაბაძე
