შეკვეთილში, მუსიკოსთა პარკის ტერიტორიაზე ახალი მრავალფუნქციური კონცეპტუალური სივრცე, სახელწოდებით „ჰეკატეს ბაღი“ გაიხსნა. პროექტი აერთიანებს მცენარეთა კულტურას, დიზაინს, გასტრონომიას, შემეცნებით აქტივობებს და მას ერთიან გამოცდილებად აქცევს.
„ჰეკატეს ბაღის“ იდეა ბუნებას ყოველდღიური ცხოვრების შემადგენელ ნაწილად აქცევს. პროექტის მთავარი მიზანია, შეკვეთილის ტურისტულ ლანდშაფტს კიდევ ერთი განსხვავებული და საინტერესო დანიშნულების ადგილი შესძინოს და დასვენების კულტურა კიდევ უფრო განავითაროს.
ახალი სივრცის კონცეფცია ჰეკატესა და მედეას მითოლოგიურ სამყაროს ეხმიანება. ბაღში სპეციალურად მოეწყო „მედეას კუთხე“, სადაც წარმოდგენილია ის მცენარეები და ისტორიებით შთაგონებული დეტალები, რომლებიც უშუალოდ ქართულ მითოლოგიურ მემკვიდრეობასთან ასოცირდება. ამგვარად, „ჰეკატეს ბაღი“ მითოლოგიას თანამედროვე ინტერპრეტაციით აცოცხლებს და კულტურულ ნარატივს ბუნებასა და გასტრონომიასთან აკავშირებს.
„ჰეკატეს ბაღის” ერთ-ერთ ბირთვს წარმოადგენს ცოცხალი სათბური, სადაც სხვადასხვა სახეობის დეკორატიული მცენარეები იზრდება. სტუმრებს საშუალება აქვთ, დაათვალიერონ მცენარეთა მრავალფეროვანი კოლექცია და სურვილის შემთხვევაში, შეიძინონ სასურველი ნერგები. ამ გზით, ადგილზე მიღებული გამოცდილება მხოლოდ სივრცეში სტუმრობით არ სრულდება.
ამასთანავე, სივრცის კონცეფცია მოიცავს მცენარეებით შთაგონებულ ექსკლუზიურ სამზარეულოს, ამ ადგილისთვის სპეციალური რეცეპტით შექმნილ სასმელებს, ჩაის მდიდარ კოლექციასა და არომატულ პროდუქტებს.
„ჰეკატეს ბაღი“ უკვე აქტიურად მასპინძლობს პირველ სტუმრებს. უახლოეს პერიოდში ტერიტორიაზე ასევე იგეგმება საგანმანათლებლო ვორქშოფებისა და სხვადასხვა შემეცნებითი ღონისძიების ჩატარება.
„ჰეკატეს ბაღი” სტუმრებისათვის ღიაა ყოველდღე, 14:00-დან 00:00 საათამდე.
