Torcho-მ ახალი სიმღერა სახელწოდებით „ბოლომდე“ გამოუშვა. კოლაბორაციული ტრეკი ქართველ რეპერთან, „შავ ბორშთან” ერთად ჩაიწერა. სიმღერის ტექსტი და მუსიკა გიორგი სანოძეს ეკუთვნის. ნამუშევრის პროდიუსინგზე გიორგი სანოძემ და გიორგი ბულბულაშვილმა იმუშავეს, პერკუსიის პარტია მერაბ სანოძემ შეასრულა, მიქსინგსა და მასტერინგზე კი ბექა მინაძემ იმუშავა. ტრეკი Sano Studio-ში ჩაიწერა.
„ტრეკის ჩაწერის იდეა ჩემს პროდიუსერს, გიორგი სანოძეს გაუჩნდა. მას სურდა, რომ საზაფხულო სიმღერა გაგვეკეთებინა. ტრეკზე მუშაობისას ბექა მინაძემ გააჟღერა იდეა, რომ ნამუშევარი რეპერთან ერთად ჩამეწერა და თავადვე ახსენა „შავი ბორში”. მისი რამდენიმე ტრეკი ვიცოდი და ეს იდეა ძალიან მომეწონა. მასთან დაკავშირება მარტივი არ აღმოჩნდა, თუმცა ბოლოს ინსტაგრამზე მივწერეთ და ასე დაიწყო ჩვენი თანამშრომლობა.
სამუშაო პროცესი ძალიან საინტერესო და ცოცხალი გამოვიდა. ზოგადად, ჩემი ყველა ტრეკი განსხვავებული განწყობის მატარებელია. მეც, როგორც არტისტი, ყოველთვის სხვადასხვანაირი ვარ და ეს მრავალფეროვნება ძალიან მიყვარს. ამ ნამუშევარშიც სრულიად ახალი, განსხვავებული ჩემი თავი აღმოვაჩინე. სტუდიაში ბევრი იდეა გაჩნდა, რომლებსაც ერთმანეთს ვუზიარებდით. ფაქტობრივად, ტრეკი რამდენიმე საათში ჩაიწერა – სიმღერა გზადაგზა იქმნებოდა. ჩემთვის ყველაზე სასიამოვნო სწორედ ისაა, როცა წინასწარ განსაზღვრული ჩარჩოები არ მაქვს და იდეები უშუალოდ მუშაობისას, თავისთავად მოდის,“ – აღნიშნავს Torcho ჟურნალ Billboard Georgia-სთან საუბრისას.
მომღერლის თქმით, მსმენელს წინ ბევრი სიახლე ელოდება. 14 აგვისტოს კუს ტბაზე Torcho-ს პირველი კონცერტი გაიმართება, რის შემდეგაც კიდევ ერთი მუსიკალური საღამო აჭარაში ჩატარდება.
„ამის შემდეგ დავიწყებთ მზადებას დიდი კონცერტისთვის, რომელიც ალბომის პრემიერას უკავშირდება. სამომავლოდ მსმენელი ბევრ ახალ ვიდეოსა და ტრეკს უნდა ელოდოს, რომლებიც ეტაპობრივად გამოვა,“ – აღნიშნავს Torcho.
