შერი პატივს მიაგებს დიზაინერს, რომელიც 87 წლის ასაკში გარდაიცვალა. ამ ამბავს გამოეხმაურნენ სხვა სუპერვარსკვლავებიც, რომლებსაც წლების განმავლობაში მისი შთამბეჭდავი სამოსი ეცვათ.
„ძვირფასი ბობი ზეცაში წავიდა,” – დაწერა შერიმ სოციალურ ქსელში 14 სექტემბერს.
მაკის გარდაცვალების შესახებ ინფორმაცია დიზაინერის ოფიციალურ Instagram-ის ანგარიშზე გავრცელდა. „მძიმე გულით გიზიარებთ, რომ დღეს ბობ მაკი გარდაიცვალა,” – ეწერა პოსტში.
„თავისი 87 წელი მან სრულფასოვნად იცხოვრა და აისრულა ოცნება, ყოფილიყო მოდისა და კოსტიუმების დიზაინერი, რაც ერთადერთი რამ იყო, რისი გაკეთებაც სურდა. მისი გენიალური და საოცარი დიზაინი მარადიულად იცოცხლებს და გააგრძელებს ამ სამყაროს გალამაზებას,” – ნათქვამია განცხადებაში.
Associated Press-ის ცნობით, მაკის პრესმდივანმა დაადასტურა, რომ გარდაცვალების მიზეზი ფილტვების ანთება გახდა.
შერისთან თანამშრომლობა მაკის კარიერაში ერთ-ერთი ყველაზე ხანგრძლივი იყო, თუმცა ათწლეულების განმავლობაში მისი ცნობილი კოსტიუმებით პოპკულტურის არაერთი ცნობილი სახე გამოჩნდა. მათ შორის არიან მადონა, ქეროლ ბერნეტი, ბარბრა სტრეიზანდი, დაიანა როსი, ტინა ტერნერი, ზენდაია, მაილი საირუსი და ტეილორ სვიფტი. საბრინა კარპენტერმა, რომელსაც არაერთი გამოსვლისას ეცვა მისი შექმნილი სამოსი, დიზაინერის გარდაცვალების შესახებ პოსტი Instagram-ის Story-ში გააზიარა და თქვა, რომ ამ ამბავმა ძალიან დაამწუხრა.
„მისმა განუმეორებელმა ნამუშევრებმა ჩემს სამყაროში უამრავი სიხარული, შთაგონება და თავდაჯერებულობა შემოიტანა და ასე გაგრძელდება ყოველთვის,“ – დაწერა კარპენტერმა.
Pink-მა, რომელსაც ასევე ეცვა მაკის დიზაინით შექმნილი სამოსი შოუებსა თუ წითელ ხალიჩებზე, Instagram-ზე დაწერა, რომ „გულმოკლულია თავისი ერთ-ერთი კუმირის გარდაცვალების გამო“.
