ხელახალი გამოცემის შემდეგ, ემი უაინჰაუსის გრემის მფლობელი ალბომი Back to Black „ბილბორდის” ოთხი ჩარტის ტოპ ათეულში დაბრუნდა. ალბომის 20 წლის იუბილესთან დაკავშირებით მისი ახალი გამოცემა 23 ოქტომბერს გამოვიდა. ჩანაწერი ტოპ ათეულში შემდეგ ჩარტებში შევიდა: Indie Store Album Sales – მე-3 ადგილი, Vinyl Albums – მე-4 ადგილი, Top Album Sales – მე-7 ადგილი და Top R&B Albums – მე-7 ადგილი. ამასთანავე, Back to Black ყველა ჟანრის Billboard 200-ში 42-ე პოზიციით დაბრუნდა.
2008 წელს Back to Black-მა Billboard 200-ში მეორე ადგილი დაიკავა. იმავე წელს გრემის დაჯილდოებაზე ემი უაინჰაუსმა ხუთი ნომინაცია მოიგო: წლის ჩანაწერი, წლის სიმღერა, ქალის საუკეთესო პოპ-ვოკალური შესრულება (Rehab), საუკეთესო ახალი შემსრულებელი და საუკეთესო პოპ-ვოკალური ალბომი (Back to Black).
ალბომის 20 წლის იუბილეს აღსანიშნავად 23 ოქტომბერს მისი რამდენიმე ახალი ვერსია გამოვიდა. მათ შორისაა გაფართოებული ვერსია, რომელშიც აქამდე გამოუქვეყნებელი B-მხარის ჩანაწერები, დემო ვერსიები და ცოცხალი კონცერტის ჩანაწერია შესული.
Back to Black ემი უაინჰაუსის მეორე და უკანასკნელი სტუდიური ალბომია, რომელიც მომღერლის გარდაცვალებამდე გამოიცა. ალბომში შედის Billboard Hot 100-ის ორი სინგლი: You Know I’m No Good და Rehab, რომელმაც მე-9 ადგილი დაიკავა.
Luminate-ის მონაცემებით, 29 ოქტომბრით დასრულებულ საანგარიშო კვირაში Back to Black-მა აშშ-ში 16 000 ალბომის ეკვივალენტური ერთეული გაყიდა, რაც წინა პერიოდთან შედარებით 185%-იანი ზრდაა. აქედან 11 000 ერთეული უშუალოდ ალბომის გაყიდვებზე მოდის (885%-იანი ზრდა), დანარჩენი კი სტრიმინგსა და ცალკეული სიმღერების გაყიდვებს უკავშირდება. ჩარტების შედგენისას ალბომის ძველი და ახალი გამოცემების გაყიდვები ერთიანდება.
Back to Black ყველაზე გაყიდვადი ალბომების ჩარტის ტოპ ათეულში მოხვედრილი შვიდი ახალი ან ხელახლა შესული ალბომიდან ერთ-ერთია. დებიუტთა შორის უმაღლესი შედეგი ანდერსონ პააკისა და Cordae-ს ერთობლივმა პროექტმა Heavy Is the Crown დააფიქსირა. My Chemical Romance-ის ალბომმა The Black Parade კი, რომელიც ასევე 20 წლის იუბილეს აღსანიშნავად გამოვიდა, 29-ე ადგილიდან პირველ პოზიციაზე გადაინაცვლა.
