თებერვალში, როდესაც ლედი გაგას მეშვიდე სტუდიური ალბომი გამოიცემა, არტისტის თაყვანისმცემლებს შესაძლებლობა ექნებათ, მეტი გაიგონ მისი ცხოვრების შესახებ.
ახალ ინტერვიუში, რომელიც Los Angeles Times-მა 19 დეკემბერს გამოაქვეყნა, გაგამ დაანონსებული ალბომის შესახებ დეტალები გაამხილა. პოპ ვარსკვლავის თქმით, ეს არის პროექტი, რომელიც ასახავს მის სიყვარულს მუსიკისადმი და მოიცავს უამრავ განსხვავებულ ჟანრსა და სტილს.
„საბოლოოდ ყველაფერი სიყვარულით მთავრდება. ჩემს ცხოვრებაში არსებული ქაოსის პასუხი ის არის, რომ სიყვარულით ვპოულობ სიმშვიდეს. ყოველ დაწერილ სიმღერას თითქოს თან მიჰქონდა ის ოცნებები, რომლებიც წარსულთან მაკავშირებდა,” – თქვა ლედი გაგამ. მან ასევე განმარტა, რომ ალბომი ძალიან ბედნიერი განწყობითა და ჟღერადობით მთავრდება.
სექტემბერში გაგამ Vogue-თან ინტერვიუში პირველად განაცხადა, რომ მისი მეშვიდე ალბომი 2025 წლის დასაწყისში გამოვიდოდა. ალბომის გამოცემა იგეგმება რამდენიმე თვით ადრე, სანამ გაგა 2025 წლის Coachella-ს ჰედლაინერის ამპლუაში წარდგება. არტისტმა ასევე აღნიშნა, რომ მისი საქმრო, ტექნოლოგიური სფეროს ბიზნესმენი მაიკლ პოლანსკი, ის პიროვნება იყო, რომელმაც დაარწმუნა, პოპ მუსიკას დაბრუნებოდა.
ალბომის დაანონსების შემდეგ გაგამ პირველი სინგლი, Disease, ნოემბერში გამოუშვა. სიმღერამ Billboard Hot 100-ში 27-ე ადგილი დაიკავა. სამი თვით ადრე, გაგამ და ბრუნო მარსმა ერთად გამოსცეს სიმღერა Die With a Smile, რომელიც ჰიტად იქცა. გაგამ Times-თან დაადასტურა, რომ ეს ნამუშევარი ნამდვილად იქნება მისი ახალი ალბომის ტრეკების სიაში.
„ეს ჩემი ალბომის მნიშვნელოვანი ნაწილია,“ – განაცხადა გაგამ ბალადის შესახებ საუბრისას. ლედი გაგას თქმით, ეს სიმღერა აღწერს იმას, თუ რას გააკეთებდა, თუ სამყაროს დასასრული დადგებოდა. მახსოვს, ვგრძნობდი, რომ ეს იყო სიმღერა, რომელიც ხალხს უნდა მოესმინა. მუსიკას ყოველთვის წერ, მაგრამ ზოგჯერ გგონია, რომ რაღაცას ქმნი, რაც კონკრეტულ ადამიანებს მოეწონებათ. თუმცა, არის შემთხვევები, როცა მუშაობ და იცი, რომ ეს ნამუშევარი სხვადასხვა ტიპის ადამიანებზე დიდ გავლენას მოახდენს.” ლედი გაგას განმარტებით, სწორედ ასეთი შეგრძნება ჰქონდა ბრუნო მარსთან ერთად ჩაწერილ სიმღერაზე მუშაობისას.
