Jazz club 1984 სოციალურ ქსელში განცხადებას ავრცელებს და მსმენელებს აუწყებს, რომ 27 დეკემბრიდან მის სივრცეში, სამკვირიანი პაუზის შემდეგ, მუსიკალური საღამოები გრძელდება.
„ქვეყანაში არსებული სიტუაციის გამო ჯაზ კლუბი 1984, სოლიდარობის ნიშნად, სამ კვირაზე მეტია დაკეტილია, რადგან ვფიქრობთ, რომ თბილისის ქუჩებში მიმდინარე ძალადობის ფონზე მუსიკალური საღამოების გაგრძელება შეუსაბამო
იქნებოდა. თუმცა, 27 დეკემბრიდან აღვადგენთ მუსიკალურ საღამოებს, რომლებიც ფინანსურად ხელს გაუმართავს მიმდინარე პროცესების შედეგად უსახსროდ დარჩენილ მუსიკოსებს. შემოსული თანხის ნაწილი კი მუსიკოსების პროფესიული კავშირის ფონდში გადაირიცხება,” – ვკითხულობთ Jazz club 1984 გამოქვეყნებულ პოსტში.
თბილისში სახელოვნებო სივრცეების უმეტესობა – კლუბები, საკონცერტო დარბაზები, თეატრები – სამ კვირაზე მეტია, არ ფუნქციონირებს. ამ დროის განმავლობაში ყველა დაგეგმილი ღონისძიება მიმდინარე საპროტესტო პროცესების გამო გაუქმდა. დეკემბრის ბოლოს გახსნის შესახებ არაერთმა ასეთმა დაწესებულებამ გაავრცელა განცხადება, მათ შორის არის თბილისის საკლუბო სცენა.
