52 წელზე მეტი გავიდა მას შემდეგ, რაც ბრიტანულმა ბლუზ-როკ ჯგუფმა Faces თავისი ბოლო ალბომი გამოუშვა. ამჯერად ჯგუფის წევრები ახალ ალბომზე მუშაობენ.
ინფორმაცია Faces-ის დრამერმა კენი ჯოუნსმა The Telegraph-თან ინტერვიუში გაამხილა. სტატიაში აღნიშნულია, რომ ჯგუფი უკვე ოთხი წელია, ახალი ალბომის გამოცემას აანონსებს. პროექტის არსებობა 2021 წელს როდ სტიუარტმაც დაადასტურა, ხოლო 2024 წელს განაცხადა: „ჯერ არ დაგვიმთავრებია, მაგრამ გპირდებით, წელს დავასრულებთ.“
უახლეს ინტერვიუში ჯოუნსმა აღნიშნა, რომ მან და ბენდის წევრებმა ლონდონში, RAK Studios-ში დაახლოებით 11 ტრეკი ჩაწერეს. მისი თქმით, ერთ-ერთ კომპოზიციაში მუსიკოსი და ტელევარსკვლავი ჯულს ჰოლანდიც მონაწილეობს. „ყველა ტრეკი არ იქნება ალბომისთვის შესაფერისი, მაგრამ უმეტესობა კარგია. ვფიქრობ, [ალბომს] წელს ვერ გამოვუშვებთ. ალბათ, მომავალ წელს გამოვა. ყველას თავისი საქმე აქვს. უცბად აღმოჩნდება, რომ The Rolling Stones-ი ტურნეშია, როდს კი ისევ სოლო კონცერტი აქვს…” – ამბობს ჯოუნსი.
Faces 1969 წელს ჩამოყალიბდა. ჯგუფი Small Faces-ის და The Jeff Beck Group-ის წევრების გაერთიანებით შეიქმნა. ბენდმა მხოლოდ ექვსი წელი იარსება, სანამ გიტარისტი რონი ვუდი Rolling Stones-ს შეუერთდებოდა, ხოლო როდ სტიუარტი სოლო კარიერას გააგრძელებდა. ჯგუფმა ოთხი ალბომი გამოუშვა, რომელთაგანაც ყველაზე წარმატებული 1971 წლის A Nod Is As Good As a Wink… to a Blind Horse აღმოჩნდა. ჩანაწერი Billboard 200-ის ჩარტის მეექვსე ადგილზე მოხვდა. სწორედ ამ ალბომშია შესული ჯგუფის ჰიტი Stay with Me, რომელმაც Hot 100-ის ჩარტში მე-17 ადგილი დაიკავა. Faces-მა ბოლო სტუდიური ალბომი, სახელწოდებით Ooh La La 1973 წელს გამოსცა.
ბენდის დამფუძნებელი ბასისტი რონი ლეინი 1997 წელს გარდაიცვალა, ხოლო იენ მაკლაგანი (კლავიში) – 2014-ში. დაშლის შემდეგ ბენდის წევრები რამდენიმეჯერ გაერთიანდნენ, თუმცა Faces-ს აქტიური ჯგუფის სტატუსი 2020 წლის Brit Awards-ის ცერემონიის შემდეგ აქვს. ბენდმა დაჯილდოებაზე Stay With Me შეასრულა.
როდ სტიუარტი 2025 წლის Glastonbury Festival-ზე ჰედლაინერი იქნება. ის ლას-ვეგასის კონცერტების სერიასაც გამართავს, რომელიც ოქტომბრამდე გაგრძელდება.
